India NSG züngsem akumtsü atema China-i memelunger

Beijing/New Delhi, November 07 (Agencies): Tan hopta Vienna nung NSG senden amentsü lia tanü China-i, India NSG züngsem akümtsü onük nung parnoki par tangatetba nungi matsüngshir, ta metetdaktsü.
Beijing nung osangbenertem den jembidang Chinese foreign ministry otongdar, Lu Kang-i, “Tan Hokolbarnü Vienna nung NSG atema plenary senden amentsü. Tanü tashi nungbo ozü tangatetba nungi onoki matsüngshir,” ta metetdaktsü.
November 4 nü Hyderabad nung India aser China linük na National Security Advisors (NSAs) senden amenba dak sentakba nung Lu-i, China-i India densema tangartem den tongtepratepa jembidar aser iba onük nung tajungtiba agi tongtepratepa jembir, ta ashi.
NSA Ajit Doval-i Hyderabad nung China state Counselor, Yang Jiechi den senden ka mena liasü, aser iba mapang nung India NSG nung züngsem akumtsü atema jembiogo, ta iba osang ajanga jangjar.
November 11-12 anogotem nung Veinna nung züngsem 48 aliba Nuclear Suppliers Group+ (NSG) senden amentsü, aser iba mapang nung nuclear non-proliferation treaty (NPT) atema tezüngzüktep agia malirtema iba telok nung züngsemtsü atema shilem ana küma lemsar o lemteptsü, ta osang angazüker.
India aser Pakistan nati NSG züngsem akumtsü atema benoka lir, saka linük anapronglai  NPT tezüngzktep agia mali.
Taoba hopta China-i, NPT tezüngzüktep agia malirtem den jembitsü aser India-i benoka aliba atemaa jembitsü, ta sangdonga liasü.
Iba mapang nung Chinese Foreign Ministry otongdar, Hua Chunying-i,  “India NSG züngsem akumtsü benokba nung, China tangatetbaji tejangja ta ni metetdaktsür,” ta ashi.
Joint Secretary (Disarmament and International Security) Amandeep Singh Gill aser China Joint Secretary, Wang Qun na October 31 nü senden amendanga iba onük atema jembia liasü.
Doval aser Yang na Hyderabad nung senden amenba dak sentakba nung Kang-i, ketdangser anati linük ana tesentaktep jembiba den külemi South Asia aser International onüktema jembiogo, ta metetdaktsü.