India NSG züngsem akumtsü atema shisadangdar

New Delhi, July 21 (Agencies): India linük Nuclear Suppliers Group (NSG) nung züngsem akumtsü atema maparen maneni inyakdar, aser iba atema tekaraba nung telemtetba ka agitsü atema sorkari iba telok züngsem, linük 48 prongla den jembidar, ta Brihostibarnü Minister of State for External Affairs, VK Singh-i metetdaktsü.
Taoba ita South Korea yimtiba, Seoul nung NSG Plenary senden alidang China linüki anir tanga linük kari India NSG züngsem akumtsü anema nokdaka liasü.
Tanü Rajya Sabha nung tasüngdangba ka langzüdang minister, V K Singh-i, “India züngsem akumtsü atema maneni NSG-i shisadangdar. India züngsem akumtsü atema NSG züngsem teimbakati melunga liasü,” ta ashi.
“India züngsem akumtsü atema US, France, UK, Russia, Canada, Australia, Germany, Netherlands aser Japan densema NSG züngsem aikati pusema liasü. Iba onük atema India-i akokba tashi agi pusemer ajak den senteper inyaktsü,” ta paisa ashi.
India NSG züngsem akumtsü atema sorkari inyakba nung Department of Atomic Energy-i nungita yaridar, ta paisa metetdaktsü.