India NSG züngsem akumtsü atema Switzerland-i pusemer

Geneva, June 06, 2016: Hombarnü nü Geneva nung India Ato kilonser, Narendra Modi aser Swiss Confederation Tir, Johann Schneider-Ammann nati Swiss nunger business lenirtem den senden amenba noksa nung angur.

Geneva/New Delhi, June 06 (Agencies): Nuclear Suppliers Group (NSG) atema elite group senden mamendang jilia Hombarnü Switzerland-i India NSG züngsem akumtsü atema pusemogo, iba den küemi saru magütsüba aser black money anema inyakba nung amalitepa inyaktsü atema India aser Switzerland na bangjemogo.

Geneva nung India Ato kilonser, Narendra Modi ajurua senden amenba sülen Swiss Tir, Johann Schneider-Ammann-i NSG nung züngsem akumtsü atema par linüki India pusemtsü, ta metetdaktsü.

India nungeri Swiss bank tem nung saru magütsüi ochimashi sen rizüngba anema raraba onük nung linük ana tsüngda taliba amalitepa yariteptsü atema lenir ana tsüngda bangjema liasü. Iba dak alia shishilembaba, investment aser vocational training nunga tesentaktep tajungba akumtsü atema bangjem.

Osangbenertem den jembidang Swiss Tir, Schneider-i, “India NSG züngsem akumtsü atema onoki pusemtsü ta parnok dang nangzükogo,” ta metetdaktsü.

Tesüiba küm ishika India-i NSG züngsem akumtsü atema inyaka arur aser taküm May 12 nü iba atemaji temepishiba benokogo.

Iba teloki India-i benokbaji June 9 nü Vienna nung aser June 24 nü Seoul nung senden alidang benoka jembitsü.

Iba dak sentakba nung Modi-i, “India NSG züngsem akumtsü atema tangatetba nung pusemba atema ni Switzerland Tir dang pelar,” ta ashi.

NSG-i nuclear sector nung tongtibang onüktem atema inyaker aser iba züngsem kümra ibaji ajanga India’er atomic energy sector ulushitsü.

Modi-isa, linük ana tsüngda black money aser saru magütsüba onük tongtibangsüa jembiogo, ta metetdaktsü.

“Saru magütsürtem ozüng matsüngdangi tekaraba nung anir arutsü atema osang lemsateptsü asoshi onoki o lemtepogo. Iba atema osang lemsateptsü asoshi tezüngzüktep agitsü atema tekaraba nung jembitsü nüngdak,” ta Ato kilonser Modi-isa shisem.