India NSG züngsem atema inyaktsü: US

Washington/New Delhi, September 10 (Agencies): US-i, India linük NSG züngsem akumtsü atema par linüki maneni New Delhi aser tanga linüktem den inyaktsü, ta US tongti ketdangser kati metetdaktsü.
Osangbenertem senden nung State Department otongdar, Elizabeth Trudeau-i, “Taruba itatem nung India linük Nuclear Suppliers Group (NSG) züngsem akumtsü atema onoki maneni India aser züngsemtem (NSG züngsemtem) den inyaktsü,” ta metetdaktsü.
Ajisüaka China onük dak sentakba nung tasüngdangba kabo lai melangzü. India NSG züngsem akumtsü nokdangtsü atema tekong meranga nokdakba linükji China lir.
“2010 küm nungi onok tangatetbaji tejangja, US-i jangjajangja multilateral export control regimes nung India züngsem akumtsü atema pusemba metetdaktsüogo. India ji NSG züngsem akumtsü atema renema lir ta onoki bilemer,” ta lai ashi.
“Taoba senden nung, NSG züngsem sorkartemi iba telok nung züngsem tasen züngsemtsü atema telemtetba ka magitet. Iba atemaji onok melung masür,” ta laisa ashi.
“Iba telok nung o lemtepbaji telok telung nung dang ayur. Ajisüaka US-i iba atemaji inyaktsü. India ji züngsem akumtsü atema renema lir ta onoki amanger. Iba nükjidong atema onoki inyaktsü,” ta laisa shisem.
Taküm June ita NSG Plenary senden nung India-i NSG züngsem akumtsü atema benoka liasü, ajisüaka China-i anir züngsem linük ishikati anema nokdakba ajanga züngsem mekümtet.