India nüjiso atema rarar rongnung Rani Gaidinliu dena lir : Nitin Gadkari

November 3, 2015 nü Peren nung Rani Gaidinliu küm 100 ajungba benjung nung Union Minister, Nitin Gadkari, Nagaland Angh, P.B. Acharya aser Chief Minister, T.R. Zeliang nungertem noksa abelen nung angur. Noksa achiji nung Union Minister Nitin Jairam Gadkari-i Patkai college junction Chumukedima nung Dimapur-Kohima 4 Lane NH29 lung azünga yutsüba angur.

Dimapur, November 3 (TYO): November 3, 2015 nü Zeliangrong Baudi Nagaland-i New Deputy Commissioner Office Complex, Peren nung Rani Gaidinliu sor küm 100 ajungba benjung ayongzüka amungdang, Union Minister, Road, Transport, Shipping & Highways, Nitin Gadkari tongti tesemdanger liasü.
“Asen linük nung Gandhi den külemi nokinketertemi nüjiso atema tasü itta raraogo. Asen linük puti otsüji khenyongi balaka, kechiyong linük tesem balala nung nübortemi Britishi yimsüsüba anema rara aser India sorkari nüjiso atema inyakertem tushir aser parnok rongnung Rani Gaidinliu dena lir,” ta Nitin Gadkari-i tanü o jembidang ashi.
“Asen nüjiso atema taküm bendanga agüja rarartem tanü asenok den mali saka parnoki mapa tulu inyakba tanü asenoki bilemteter. Asen lennirtemi nüjiso angutsü, sensak tia nungi salatsü aser mapa inyaktsü nükjidong ayubatem asenoki tanüa benshidi. Temulungtetba takang aser terenlok maparen ajanga ochimashi aser sensak tia agientsü,” ta Gadkari-isa nübortem ayongzüka jembi.
India ya nisung temeyoktep aliba linük ka lir aser kin, kidong aser sobaliba balala alemli nungi renlokyonga aru. India ya nütsüng yongsükbo sensaker saka linük takar ka lir aser iba ya shisaliok ajanga koktettsü, ta paisa shisem.
Tanü Union Minister-i terenlok mapa inyaktsü atema jembidang, Peren adena Maram nungi Dimapur tashi gari lenmang yanglutsü metetdaktsü aser ibaji March 31, 2016 matongdangsa tenzüktsü aser iba sülen Nagaland nung kilometer 10,000 gari lenmang yanglutsü, ta paisa shisem.
Sentong nung Nagaland Angh, P.B.Acharya-ia o tatsüka jembidang India’er nüjiso rara nung yimtsüng aser tesem shia nungi ‘hero’ ka ka lir aser item amaji Rani Gaidinliu-ia British yimsüsüba anema rara. Anungji asenoki lai mapa tajung inyakba atema nüma tanga bilemtsüla.
Sentong nung Nagaland Chief Minister, T.R. Zeliang-ia Rani Gaidinliu indang taküm otsü tejangja kar metetdaktsü.
“Naga nunger adianutemi küm 50 tejaklen atalokbatem asoshi tatok agütsütepdi aser tamangba yimsü balala akhümtsübutepa, pei tamangba yimsü sülen anidaker tajung ka ka asütsü merangdi, kechiyong India ya tamangba yimsü temeyoktep aliba linük la lir” ta TR Zeliang-i ayongzük.
Yimrup Village Citizen’s Union Chairman-ia Tura jail nungi chiokba sülen Rani Gaidinliu-i Yimrup yimtsüng nung küm 12 aliba menungra bilemtetba osang lemsatep.
Sentong nung Rangsam N. Hau, president ZB(N)-i tesentepertem pela agizük, Meijiang Gonmei, General Secy, ZB(N)-i anküp tepela o jembi aser Zeme, Liangmai o Rongmei yartsüngsangertemi shilem balala agia liasü.
Nagaland nung sen crore 2164 endoka gari lenmangtem yanglutsü
Tanü Nitin Jairam Gadkari-isa Dimapur-Kohima Road four laning atema lung azünga yutsüogo.
Iba sentong ya Chathe River Bridge anasa, Patkai College junction Chumukedima nung agi aser iba mapang Gadkari-i India sorkari mapatong balala agizükba osang metetdaktsü.
India sorkari mapatong inyaktsü agizükbatemji, kilometre 126 NH-39 Kohima – Imphal road (Rs. 1250 crores), kilometre 63 Peren – Dimapur road (Rs. 364 crores) aser kilometer 61 Kohima Dimapur bye-pass road (Rs. 550 crore) lir.
Union Minister-isa Nagaland Chief Minister dang item mapatong March 2016 matongdang tenzüktettsü asoshi tekaratiba nung forest & environment clearance aser ali alizükba maparen inyaktsü ayongzük.
Gadkari-isa sangküm Nagaland nung sen crore 15000 crore indang mapatong ka inyaktsü tebilemba lemsatep aser iba atema Nagaland Chief Minister-i nübortem den asüngdangya asütsü tetuyuba agütsü.
Paisa, Kohima aser Dimapur yimti nung NH kilometre 25 yanglutsü atema sen crore 250 agütsütsü metetdaktsü.
Centre sorkari taruba küm pungu tsüngda North East nung sen crore lakh 1 endoka gari lenmang kilometer 10,000 den timba yanglutsü telemtetba agia lir. Sen crore lakh ka mapatongtem inyaktsü lemtetba rongnung sen crore 10,491 indang mapatong 23 kübok gari lenmang kilometre 744 tashi yanglutsü tenzükogo, ta Gadkari-isa metetdaktsü.
Iba sentong nung Nagaland Angh P.B. Acharya-ia o jembidang, item mapatong mapa küma inyakba sülen Nagaland tejakleni aotsü, ta ashi.
Centre sorkari North East renlokdaktsütsü atema tenangzükba agia mapa inyakba atema Angh-i tenüngsang agütsü aser ‘North East merenlok tashi India merenloktsü’ ta PM Modi-i ashiba olen pai lepshia metetdaktsü.
Sentong nung Chief Minister of Nagaland, T.R. Zeliang-i, “Iba anogo ya Naga nunger asoshi otsüsütsü anogo ka lir” ta ashi aser pai Union Minister nem tenüngsang agütsü.
TR Zeliang-i local contractors dang mapa junga inyaktsü mepishia metetdaktsü, aser iba lenmang ya Nagaland nung alir ajak asoshi asünung ali kiburtemi Sorkar den yariteptsü ayongzüker ta paisa shisem.
NHIDCL, MoRTH aser Works & Housing Department Nagaland nungeri ayongzükba lung azüngba sentong nung TBC Chumukedima Pastor-i temoatsü meshia sarasadem aser Chumukedima Cultural Troup-i ken ka aten.