India nung $20 mn enoktsü:Facebook

New Delhi, August 13 (Agencies): Social media, Facebook ajanga Brihostibar nü ashiba agi, FBStart inyakyim ajanga parnoki India nunger apps yanglurtem nem 2014 nungi tang tashi nung US sen million 20 tajangzük agüja arur.

Facebook-i FBStart sentong ya ajanga apps yanglutetertem den tesendaktep yanglur Parnok apps yanglutetertem asoshi Facebook ya sabang tajung ka amai lir. Facebook-i tang tashi nung Asia Pacific linüktem asoshi parnok ket nungi US sen million 50 shi tajangzük agütsüogo.

“Apps yanglutettertemji onok asoshi kanga maneni nüngdaker aser onoka tila ka nungi tenzük asünung onoki tang mapa tajung inyaktsü tetenzükertem yaritsü angateta lir, ta Facebook, Product Platform Partnerships nung director, Ime Archibong-i ashi.

“Iba inyakyim ajanga Facebook-i apps yangluteter tasentem yaria alima nung tajungba kümdaktsütsü merangtsü,” ta pai ashi.

Apps yangluteter timba rongnung US sülenbo tanabuba jenjangji India nungi lir.

“US dak alaka linük tanga dang nungibo India nungi apps timba yangluteter. Top-grossing apps noklang nung shilem 75 bo India nung yanglubatem lir, ta Archibong-i ashi.

Archibong-i, FbStart aser Internet.org ajanga apps yanglurtem nem sabang tajung lapoktsür, Facebook-i alima den junga sendaktepner aser ibaji ajanga tamshirtem ang tali ajangzüktsü, ta ashi.

FBStart inyakyim ajanga apps yanglurtem nem sen agütsüba yimya asemsü küma lemsar agütsür koba ajanga firm tulu nem US sen 80,000, temtsüngda pur US sen 30,000 aser tangang purapiteter telok nem US sen 15,000 agütsür.