India nung 2024 küm tebur Asia Cup ayongzüka asayatsü

Mumbai, Chiteni/July 29 (Agencies): India nung 2025 küm tebur Asia Cup ayongzüka asayatsü, koba T20 format nung asayatsü ta Honibarnü sangdongba Invitation for Expressions of Interest (IEOI) document nung Asian Cricket Council’s (ACC)-i shia lir. Iba kuli kaket ajanga 2024 nungi 2027 tashi ACC Sponsorship Rights atema IEOI benoktsü jaoka liasü.

2023 küm tebur Asia Cup Pakistan aser Sri Lanka na nung ayongzüka asayaogo, koba 50-overs format nung asaya liasü.

2027 küm tebur Asia Cup ya ODI format nung asayatsü, koba Bangladesh-i ayongzüka asayatsü. Asayamung anaprongla nung team trokrok; India, Pakistan, Sri Lanka, Bangladesh, Afghanistan aser qualifying asayaba sülen team ka asayatsü. Asayamung shia asaya 13 asayatsü.

Tetsür Asia Cup-a (15 matches) T20 format nung 2026 küm asayatsü. 2024 tetsür Asia Cup Deobarnü tembangogo. Final asaya nung Sri Lanka-i wicket ti agi India koka tang mezüngbuba iba asayamung kokogo.

Iba mapang tsüngda ano Under-19 men’s Asia Cup pezü asayatsü, kong asaya 15 asayatsü.

Kasa mapang nung Indian Cricket Association-i, taoba mapang First-Class crickete asayar 26 nem khen atema senotsü teyari agütsütsü. Item cricket asayartem ya First-Class asaya 10 nungi 24 tashi asayar alirtem aser arishi küm 70 temapur asütsü, shirnok nem BCCI mesüra pei state state association temi khen danga teyari magütsüi lir. Taküm March 12 nü Board senden amenba mapang ICA-i iba telemtetba ya agia liasü.

ICA-isa, züngsemtem shirnok First-Class asaya 10 dak tajemba asayar lir aser BCCI medical reimbursement agi mayemjemi ali, parnok nem Group Health Insurance (Rs 2.5 lakhs) agütsütsü telemtetba agiogo.