India nung akhümtsübutep liasü aser teti alitsü: Javed Akhtar

Delhi, Jan. 27 (Agencies): Bollywood kenzülur aser film yanglur, Javed Akhtar-i, Hindu telok kari alia bilemloka inyaker Muslim nunger ama benshir, ta ashi.

Paisa, India nunger lokti nung teti akhümtsübutep liasü aser alitsü, ta ashi.

India Today osang ajanga ashiba agi Akhtar-i, “1975 küm tekülem (Hindu) ki ka nung asayamenüba indang scene ka ni sayu. Tanübo ni yamaji masütsü. Ajisüaka 1975 küm ni mosque (Muslim tekülem ki) nungbo iba scene mesayu, kechiyong iba nungjibo akhümtsübutep maliasü. Tangbo kaji-a (Hindu) kasa dang. Tangbo parnoka densemogo, iba ya tejashitsü ka lir. Hindu ta mejembir. Ibaji tai asütsü, (saka) Hindu telok kar,” ta ashi.

Delhi nung Mongolbar aonung akhümtsübutep maliba onük nung o lemtepba sentong ka nung jembidang Akhtar-i aji oda jembia liasü.

Paisa, Aamir Khan indang Hindi film ‘PK’ kanga takok nguogo, kechiyong ibaji Hindu nunger dak ajemdaker yangluba otsü lir, ta ashi.

“Muslim linük kar nunga iba film mesükba Muslim maitsü nung yanglutettsü asü ta ni shisadanger, iba film ji takok angutsü,” ta paisa ashi.

“Lokti nung akhümtsübutep maliba tensaji lendong tia ka nung lir ta jembir nisungtem lir. Nibo ibaji mamanger. Linük nung akhümtsübutep lir ta nisung kari jembir. Ibajia ni mamanger. Atangjibo iba tetsüngda nungji lir. Atangji, India nunger lokti nung teti akhümtsübutep lir aser alitsü. Loktiliba nung telok kar lir, aser parnokji teti rara nung densema lir,” ta Akhtar-isa ashi.

Linük nung akhümtsübutep mali ta lungkak aita kaketzülurtem aser film yanglurtem aikati award meyipa agütsüba dak sentakba nung pai, “Iba award (Sahitya Akademi award) ya kaketzülurtemi kü nem agütsü ta ni metet, anungji kechiba ni meyipa agütsütsü (?),” ta ashi.