“India nung alir nisung shiaji tajitettsü nung Hindu lir” : Bhagwat. (Everyone living in India is Hindu by identity : Bhagwat)

~  Dr. Y. Imti Tzüdir, Dimapur.

RSS Chief Mohan Bhagwat par benjong Bhavishya ka Bharat tatem nü September 18, 2018 nung pai o jembi dang yamai ashi, “India nung alir shiaji tajitsü nung aser kin ajanga Hindu nunger lir” (Everyone who lives in India is Hindu by identity, nationality). Iba ocet ya September 19, 2018 nü osang kaket kar nung adoka ngua nibo kanga dang aoksa aser tsübuseta bilem. Iba oren ya angatettsü kanga tasak ta nibo bilemer kechiaser India lima nung alir nisung shiaji tereprangtsü aser kin ka dangbo masü. Bendangertem (foreigners) aika par lima nungi arua India nung mapang tatsüka atema service inyaka alirtem alitsü. Tatishitsü agi: pei pei lima Embassy nung inyaker jenti India lima nung lidagi aser yimsü balala nung sayutsüngir aika arua India nung mapa inyakdar. Saka parnokbo India nung alir India Senso nisungtem aser kin aika lir. Parnok tereprangtsü (identity) memesüktep aika lir. Tatishitsü agi Naga nunger, Arunachal nunger, Mizoram nunger, Garo, Kashi, etc. nungertemji India state balala nung alir nisungtem e.i. West Bengal, Bihar, Orissa, Kerala, etc. nisungtem den tereprangtsü (identity) khenyongi balala lir. Item tenem nisungtem India senso asüyonga tereprangtsü, sobaliba, oshi etc. nung tanga state nung alirtem den balala lir.
RSS Chief Bhagwat ajanga ano yamai jembi, “India nung alirtem ajonga Hindu nunger lir”. (All those live in India are Hindus). Saka asenoki metet India sensotem parnoki amangnüba yimsü amangtsü akok. Anungji ajak Hindu yimsü amangertem dangbo masü. India Temzüng Leniba nung (Preamble) nung shia lir, Indiaji “Soereign, Socialist, Secular, Democratic Republic” Government ka lir. Indian Constitution Article 25-28 nung tamangba yimsü nung nüji agüja lir (Freedom of Religion). RSS Leniri ashibaji “India nung alirtem ajakji Hindu nunger ta ashiba yabo India Temzüng den meputep onük ka lir. Kechiaser India nung tamangba yimsü aika lir, e.i. Hindu, Muslim, Christian, Sikh, Jain, Buddhist, etc. India temzüng nung India sensotem pei pei amangnüba yimsü amangtsü akok ta shia lirji India nunger ajonga Hindu nunger ta pai ashibaji tai lir. Pa nükjidongji tamangba yimsü ajonga samadaktsür Hindu yimsü dang senso ajongai amangtsüba sendong ta nibo angateter, kechiaser iba ya RSS ajanga Hndu nungeri atemzüka ayuba nükjidong ka lir. Tamangba yimsü lenir kati iba ama tesayuba meproktsüla.
Temeshi Laishiba nung yamai ashir, “Nisung kari tesayuba balaka agi sayura, aser asen Kibuba Yisu Khrista o nung, aser temeshiba amato sayuba o nung haura makara, pa angaka ogo. Pai kecha memetet, saka tetoktep o aser bangsentep o mokokaji, raratep, tatala tamajung, temulung malem, aser temulung memerük akümba, aser ochia maka, nisungtem nungi rarabangsen adoker.” (1 Timoti 6:3-5). Mathi 24:4-5 nung yamai ashir, “….shingaia nenok mashileni manidaktsütsü kümdangang. Kechiaser kü nüng nung aikati, “Ni Khrista” ta jembia arutsü, aser aika mashileni anitsü”. India lima ya ozüng agi tamangba yimsü ka dang amangtsüba Govt. ka masü (India is a Secular Democratic Republic). Tang aliba temzüng dang nungi kanga tamajungba temelenshi tarudaktsü ta sarasademdi. Tongtibangsa asenok Naga nunger aser talisa asen Aortem arungma, asenoki amangba Khrista dak tali akanga amangdi aser tatem nung asenok ajak teti tatem maka tekümtet ngur kotaki aotsü teimla nung bendanga amangdi.