India nung ano nisung ana dak Coronavirus tashidak putetogo

New Delhi, March 02 (Agencies): New Delhi nung tang mezüng nisung ka dak novel Coronavirus tashidak putetogo, aser Telangana nunga nisung ka dak iba tashidak putetogo, ta Hombarnü Health Ministry-i sangdong ka ajanga metetdaktsü.
Delhi nung iba tashidak putetsangji Italy linük nungi aruba liasü aser Telangana nung iba tashidak putetsangji Dubai (United Arab Emirates yimtiba) nungi aruba liasü, ta kasa osang ajangasa metetdaktsü.
Union Health Minister, Harsh Vardhan-i, “Delhi aser Telangana na nung nisung ana dak COVID-19 (coronavirus) putetogo. Tenaji ka Italy nungi aser ka Dubai nungi aruba liasü. Tang tashi nung India nung ajak agi nisung pongu dak iba tashidak putetogo,” ta metetdaktsü.
“Onoki jelia renema lir aser tanga linüktem tensa junga mita atadar. Onoki agia aliba telemtetbatem reprangshitsü atema onoki o lemtepdar,” ta Minister-isa metetdaktsü.
Iba ama tensa melenshiba nung ajemdaker tanga linüktem nungi ainlen senzüba tenokdangba maneni agütsütsü, ta pai ashi.
“Airport 21, major seaports 12 aser minor seaports 65 nung passenger tem dak screening agidar. Tang tashi nung airports balala nung passenger 5,57,431 dak screening agiogo aser seaports balala nung passenger 12,431 dak screening agiogo,” ta Vardhan-isa metetdaktsü.
Tang alima nung Antarctica dak alaka continent ajak nung iba tashidak prokshiogo; nisung 90,000 dak iba tashidak putetogo aser nisung 3,000 dak tema süogo.