India nung anogo shia plastic jana ton 25,000 shi adoker: Sorkar

New Delhi, November 22 (Agencies): India nung anogoshia plastic jana ton 25,000 dak tema adoker, aser iba nungjagi shilem 40 bo mebendener, aser ibaji ajanga libajen menener, ta Hokolbarnü Centre sorkari Lok Sabha nung metetdaktsü.
Lok Sabha nung tasüngdangba ka langzüdang Union Environment Minister, Prakash Javadekar-i, fast moving consumer goods (FMCG) sector nung plastics kanga amshiba ajanga plastics kanga nüngdaker, aser ibaji ajanga plastic jana indokba tsütsü tayongzükba ajurur, ta ashi.
“Rongsenkettsüng maneni renlokba den liromedema consumer goods demand tali akümer. Item rongnung kuli kaji Fast-Moving Consumer Goods (FMCG) sector-i plastic amshiba ya lir. Plastics ya mapang talanglang amshitetba, tashi aketba aser jenjang dalang asübayong Industries atema taleptsü asoshi amshiba tongtibang oset ka kümogo. Ibaji ajanga plastic kanga demand kanga alibayong plastic waste management timtem ajurur,” ta Javadekar-i metetdaktsü.
Central Pollution Control Board (CPCB)-i India nung tongtibang yimti 60 nung asadangba osang ka nung ajemdaker Minister-i, “Item yimti nungji anogoshia plastic jana ton 4,059 adoker, aser iba nungji ajemdaker asadangtetba agi, anogoshia India nung plastic jana ton 25,940 adoker. Iba nungjagi anogoshia plastic jana shilem 60 shi- ton 15,384 shi bendena tanaben amshitsü atema recycle asür. Anogoshia tanüngba plastic jana ton 10,556- shilem 40 ji mebendener aser ibaji ajanga alima/libajen menentsür,” ta metetdaktsü.
Minister-isa, plastic jana tebilemtsü anema biodegradable technology amshitsü atema research agitsü asoshi Central Institute of Plastics Engineering and Technology (CIPET)-i mongintemi akümba telok ka tentetogo, ta metetdaktsü.