India nung asangurtem anioktsü atema Rahman nem tetuyuba agütsü

Bhubaneswar, December 20 (Agencies) : December 16, 2015 nü al-Qaeda kiralongrar ta temulung melemi bilemer Abdur Rahman apu aser pa ya kiralongrar teloktem nung asangurtem anioktsü atema mapa inyaka liasü, ta Deobarnü police ketdangser kati ashi.
“Bangalore nung Abdur Rehman-i Delhi nung apuba Mohammed Asif den ajurutep. Taoba mapang Pakistani al-Qaeda co-ordinator kati Asif dang nisung tasen anioktsü atema Rahman den tongteprateptsü teuyuba agüja liasü” ta Commissioner of Police R P Sharma-i osangbener dang ashi.
Arishi küm 41 tain Asif ya AQIS tetenzüker rongnung züngsem aser al-Qaeda asoshi Indian head (amir) lir ta bilemer.
AQIS ya al-Qaeda indang kongsang ka lir. Osangbenertemi Odisha nung Rahman-i nisung tasen karbo anioka lir asü mali ta asüngdangdang, Sharma-i “Police telok ka Jharkhand-i aotsü aser idakji parnoki Rahman-i ozüng alema lapokba madrasa nung kaketshirtem dang asüngdangyatsü” ta langzü.
Rahman ya Cuttack nung liasü saka pai Kharkhand kübok Ranchi aser Jamshedpur tesemtem mapang shia semdang, ta Commissioner of Police-isa ashi.
Sharma-isa ashiba agi, asüng ACP ka lenisüba kübok police telok ka Delhi-i aotsü aser parnoki Delhi police nung special cell den yaritepa mapa inyaktsü.
Iba telok jagi Rahman-i bendanger den tesentaktep ayuba aser senotsü amshiba osangtem metetpelatsü.
Jharkhand nung Rahman-i ozüng alema lapokba madrasa ji state sorkari shibangtsüogo aser kaketshirtem pei pei kidangi yokogo. Jagatpur police station nung madrasa nung tesayur ana dang police-i asüngdangyaogo.