India nung ‘Beauty and the Beast’ live stage musical sayutsü

Mumbai, August 12 (Agencies): Bodbarnü Disney India-i India nung tang mezüngbuba atema “Beauty and the Beast” live stage musical ka ama bener arutsü osang metetdaktsüogo.

Iba live stage musical ya Academy Award anguba animated feature film nung ajemdaker yanglu aser New York nung Broadway aser London nung West End ama India nunger danga sayutsü.

India nung musical theatre performer 100 dak timbai “Beauty and the Beast” ya stage nung sayutsü, ta Disney India-i metetdaktsü.

“Onok indang audience dangi world class entertainment bener arutsü atema onoki teti bilemer aser onoki meimba Broadway musicals bener aruba ajanga onoki bilemtsüba kuli sayur” ta Disney India managing director, Siddharth Roy Kapur-i ashi.

‘Beauty and the Beast’ ya alima tesem balala nung nisung million aikati sapur aser India nunga iba ya ajanga takok tulu angutsü, ta paisa shisem.

Iba production ya English oshi nung minute 130 alitsü aser October nung December 2015 tsüngda Mumbai aser Delhi kübok tesem balala nung sayutsü.