India nung ‘CASHe’ app sayaogo

New Delhi, April 03 (Agencies) : Entrepreneur aser nija equity investor V. Raman Kumar-i ajungkettsüba fin-tech company, TSLC PTE Ltd.-i mobile atema ‘CASHe’ sabang ka lapoktsüogo aser iba app ajanga tamshirtemi mashi mapang aser tesem mashi ka nungi minute ishika tsüngda nung sen aputettsü.
CASHe ya Raman Kuma-i kanga jangraba tech inyakyim ka lir, koba ajanga tensa kara aienba den peta sen aputsübutsü lenmang lapoktsür. CASHe app ya Mumbai nung Bollywood star Arjun Kapoor-i sayatsü.
CASHe app lapoktsür den Advisory Board nungi Dr. Rakesh Mohan, tesüiba mapang RBI nung Deputy Governor & Director IMF aser ajaki kanga jangja meteta alisang marketing tettsüti Suhel Seth aser tech tsütsü lenir Yezdi Lashkari nunger dena iba sentong nung aden, ta TSLC PTE LTD mendenbuba V Raman Kumar-iu ashi.
“Tanü asüng mongintemi tang tensa bank inyakyim ajanga metongtetba nüngdakbatem rajema tonga lir. CASHe ya parnok dang nungi apuzüka amshirba dang lir. Iba smartphone sabang tasenba ajanga onoki nüburtem sen aaba jenjang kanga junga asadanga shisadanger tang rongdak nung sen aputsütsü. CASHe ajanga sen aputsüba ajak, RBI nung züngoka aliba NBFC, One Capitall Ltd. ajanga agütsütsü,” ta pai ashi.
CASHe nung ‘proprietary technology’ amshitsü aser ibaji ajanga sen apurtem kanga junga mita “Social Loan Quotient” (SLQ) inyakyim kübok sen kwi apudir iba alangji oset ka meshitsü.
CASHe ajanga sen aputsübuba yimya nung temelenshi bentsür arutsü aser ibaji ajanga credit rating majungba aser bank inyakyim ajanga sen maputeti alirtem nema maongka lapoktsütsü.
Sen nüngdakertemi smart phone nung pei osang tera ajenoktsüba sülen minute ishika tsüngda nung sen parnok ket atongtsü. CASHe ajanga aputsüba senji anogo 15 nü atema dang lir aser sen aputsütsü inyakba atema khen atema sen taa agiba dak alaka tanga taa kecha magitsü. CASHe ajanga arishi küm 20 aser 35 tsüngda alirtemi sen aputettsü.
Mapa inyakertem shirok nem iba sen aputsü langa lir ta reprangteta sen aputsüdir parnoki aaba sen noklang nung shilem 40 tashi aputsütsü aser sentemji credit card temi agiba ama agitsü.
CASGe sayatsüdang Arjun Kapoor-i, “Tang putu nung asenoki nüngdak ajak tangsatang atalokdaktsüner aser aji oda ataloka arur. Onok putu nungbo meranga inyaker aatsü aser pelatepdang taaba dang nungi timbasa entoka liasü. Onok putu dang nungibo kü tsürabur mapang nung sen rizünga ayutsüji kanga tongtibang süa bilem.” ta ashi.
CASHe sabang ya ajanga nüngdakba sen mapang shitak nung agütsütsü. Iba inyakyim ajanga sen tsütsü nüji agütsüba den asen teinyaktsütem tali jangjadaktsür. Ni CASHe den sentaktepba atema kanga pelar, ta paisa ashi.