India nung cervix cancer ajema kümogo

Lucknow, August 01 (Agencies): India nung cervix cancer agi kümshia tetsür 67,000 shi asür, ajisüaka tangbo cervix cancer agi asür kanga ajema kümogo.
National Center for Disease Informatics & Research Director, Dr. Prashant Mathur-i, “National Cancer Registry Programme-i asadangba nung ajemdaker cervical cancer agi asüba ajema kümogo,” ta metetdaktsü.
Paisa, “Nija merükmejua aliba jenjang tajungba akumba, tetsür kiyimba arishi ajungketba, tanur mabentsü contraceptive methods amshiba aser vaccine ajanga iba tashidak ajema akumer,” ta metetdaktsü.
“India nung tesem balala apir tashidak balala lir. Tatishitsü agi, Northeast nung aliba state tem nung food-pipe mesüra tebok cancer kanga bulur aser North India nung oral cavity aser tepokpok cancer kanga bulur,” ta pai ashi.
Dr Mathur-isa, Kerala nung thyroid cancer kanga bulua kümdar, aser iba indangji junga asadangdar, ta ashi.
Iba dak sendakba nung pai, NCRP nung medical centers ano tali nüngdaker, ta ashi.
2016 küm SGPGI nung radiotherapy department NCRP nung züngoka mama, cervix, tekolak aser tekong cancer indang bushisüngdangdar. Uttar Pradesh nung NCDIR-i nütsüng-yongsük nung ajemdaker cancer registry programme benoka inyakdar.
“Cancer tashidak indang osang ya ketdangsertem nem metetdaktsütsüla ta mongintemi ashir. Karnataka-ibo iba maparen tenzükogo. Union health ministry-i iba ya ozüng ka küma mebenokdangyongi tanüngba state temia yamaji inyaktsüla,” ya Dr Mathur-i ashi.