India nung Cesarean delivery kanga bulua kümogo: Sorkar

New Delhi, August 05 (Agencies): Union Health Minister, J P Nadda-i, linük nung cesarean delivery mesüra C-Section ta ajaba surgery kanga bulua kümogo, aser iba ya asenok ajak atema tebilemtsü onük ka lir, ta metetdaktsü.
“C-Section (surgeries) kanga bulua kümogo, talisa nija hospital tem nung iba ya kanga bulua kümogo. Iba ya asenok ajak atema tebilemtsü onük ka lir,” ta pai Question Hour mapang nung metetdaktsü.
Nadda-i ashiba agi, C-Section kanga bulua agiba ya kuli aika ajanga lir, aser item rongnung nijai melungba, taküm samatsü tsübuba, mapang kümzüktsü atema bilemba külitem densema lir.
“Ajisüaka C- section agiba ajema akümtsü atema onoki meranga inyakdar. Onoki counseling agütsüba maparen tenzükogo,” ta paisa metetdaktsü.
C-section surgery ya, tanur bena aliba mashisa tsür teboklang rangboker tanur agitetba operation/surgery inyakyim ka lir.
Minister-isa, Central Government Health Services-empanelled private hospitals ajanga anguba osang ajanga ashiba agi, tanur asoba 31,296 nungi tanur 17,450 bo C-Section agia rangtetba lir, aser ibaji shilem 55.75 shi lir, ta metetdaktsü.
CGHS-i CGHS empanelled hospital ajak dang hospital reception anasa C-Section kwi agiar ibaji tezüluba nung maloka yutsütsü tuyuogo, ta Minister-isa shisem.