India nung Covid case million 30 jungogo aser 3,90,600 süogo

New Delhi, Aami/June 23 (Agencies): Yaküm küm tetenzüklen India linük nung coronavirus wara prok tenzükba sülen nungi tang tashi nung linük nung nisung million 30 (crore 3) tema dak coronavirus tashidak putetogo; alima nung nisung crore 3 tema dak iba tashidak putetba linük anaji US aser India na dang lir.

India nung coronavirus case crore 2 ajungba sülen anogo 50 kija nung crore asem ajunger. Taküm May 3 nü India nung coronavirus case crore 2 ajung, iba sülen anogo 14 nung lakh 50 bendenlok aser tesüsa anogo 36 nung (May 17 nungi June 22) ano lakh 50 bendenlokogo.

Tesüiba hopta ishika tsüngda India nung coronavirus case kanga ajema kümdar, talisa June 15-21 tashi nung coronavirus positive putetba shilem 5 den tajemba kümogo, aser tang India nung district ishika nung ang coronavirus kanga puteter.

India nung coronavirus tashidak agi shiranger 3,90,600 süogo aser iba nungjagi nisung 2,33,402 (shilem 63) bo taküm March 1 nungi coronavirus wara tanaben prokba mapang nung asü.

Tang tashi nung India nung nisung 30,027,364 dak coronavirus putetogo aser US nung crore 3.44 dak iba tashidak puteta lir.

Tesüiba ghonda 24 tsüngda India nung ano nisung 50,848 dak coronavirus putetogo aser iba tashidak agi shiranger 19,327 anepba sülen tang teshirangdakpur 6,43,194 dang kümogo, ta Bodhbarnep Union Health Ministry-i metetdaktsü.

Tesüiba ghonda 24 tsüngda India nung coronavirus vaccine dose lakh 88.09 agütsüogo. Taküm küm tatembanglen tashi nung linük nung tain ajak nem vaccine agütsütsü sorkar nükjidong lir, aser ibaji ataloktsü atema anogo shia vaccine dose lakh 97 agütsütsüla.