India nung driving licence shilem 30 bo taila lir: Gadkari

Nagpur, April 01 (Agencies): Honibarnü Union road transport minister, Nitin Gadkari-i, linük nung driving licence shilem 30 bo taila lir, ta ashi.
Nagpur nung ‘Smart India Hackathon 2017’ sentong nung jembidang pai, “Linük nung driving license shilem 30 bo taila lir. Tang nungibo driving licence ji e-governance kübok electronic ajanga dang register asutsü,” ta metetdaktsü.
Minister-isa, nisung kati driving test ajangtetba sülen anogo asemnü tsüngda license agutsütsü atema Regional Transport Office (RTO) dang tuyutsü, ta ashi.
“Licence alisang indang osangji linük tesem ajaklen angutsü aser pai/lai kecha nunga license taila meyanglutettsü. Tang nungi tenzüka driving test majangteter shingaia diving license mangutsü,” ta Gadkari-i ashi.
BJP lenirisa, driving examination centres 28 lapokogo aser maneni 2,000 tali lapoksemtsü, ta metetdaktsü.
“Iba test ajangtetba sülen asemnü tsüngda RTO-i driving license magutsüra RTO anema temerenshi alitsü. Ibaji ajanga ochimashi malitsü,” ta pai ashi.
“Ano külen traffic signals nunga camera tem ayutsü, koba ajanga police nübo nüngdakba ajema akumtsü,” ta pai ashi.
“Gari lendong atalokbatem shilem 50 bo engineer tem tai ajanga lir. Gari lenmang design mejungi yangluba ya tebilemtsü onük ka lir,” ta minister-i ashi.
Yashi Union Cabinet-i Motor Vehicles (Amendment) Bill, 2016 agizükogo.