India nung ‘Gandhi vs Aazaad’ mesükba film nüngdaker: Abhay Kumar

January 10, 2016: Tan mezüng süa ‘Gandhi vs Aazaad’ film ajanga film direct asütsü tenzüksang, Abhay Kumar-i, India nung iba mesükba film kanga nüngdaka lir, ta ashi.
“India nung tanü asüng lanurtem aser linük rangben nung ‘Gandhi vs Aazaad’ mesükba film kanga nüngdaker,” ta pai ashi.
Iba film ajanga mangatettep kar adoka liasü, ajisüaka film nung India indang otsü tejangja kar enoksema lir.
‘Gandhi vs Aazaad’ film nung alima memetba Gandhi otsü kar temai adoka metettsü, ta Abhay-i IANS osangbenertem dang ashi.
Abhay ya Bombay Talkies studio ngutetsang, Raj Narayan Dube’er semchir lir aser pai Gandhi indang otsü tamajung dak ajemdaker yangluba film ajanga temelenshi bener arunür.
Iba studio nung 1954 küm Dev Anand, Ashok Kumar aser Meena Kumari nungeri shilem agiba ‘Baadbaan’ sayaba sülenbo tang iba film ya sayatsüba lir.
‘Gandhi vs Aazaad’ film ya noklang nung shilem 95 tashi edit süa renemogo aser February ita nungbo sayaner. Iba tatalokba otsü nung Abhay-i Chandra Shekhar ‘Azad’ indang shilem agia lir.