India nung GST tenzükba ajanga putu tasen ka nung ayaokogo

New Delhi, July 1 (Agencies): Küm 17 tashi atsütepa aruba sülen June 30, 2017 ayaterm nung Goods and Services Tax (GST) tenzükogo.
Parliament Central Hall nung ayonga agiba sentong nung Prime Minister Narendra Modi-i, “iba sentong ya India Nüjiso anguba sentong mesüka lir” ta ashi.
Iba Central Hall nung Jawaharlal Nehru aser tanga linük lennirtemi India nüjiso aniok aser India-i Linük Temzüng mulunga agizük, ta Modi-i ashi.
Modi-i GST dang ‘Good and Simple Tax’ ta jaloktsü aser Bhagwad Gita o Sardar Vallabhbhai Patel-i province balala India sorkar kübok aniokba den atishia olen ka jembi. Pai ashiba agi, “Bhagwad Gita nung tapu 18 aliba ama GST Council-a 18 ben ajurutepa senden amen aser GST kübok sarutemji, Sardar Vallabhbhai Patel-i provinces 500 tashi India sorkar kübok aniokba ama 500 lir.”
“Sardar Vallabhbhai Patel-i provinces 500 tashi India nung longjemdaktsüba ama, state aser Union Territory 29 nung saru tapu 500 tashi ka akümer. Linük nung shisakartemi GST ya asangsang nung ataloktsü atema inyaka aru aser tanü iba ya cooperative federalism indang tatishitsü tajung ka asütsüsa tenzükogo” ta Prime Minister-isa metetdaktsü.
Modi-i o jembiba sülen Tir Pranab Mukherjee-ia o jembidang, “GST tenzükba atema ni kanga pelar. 2009 küm ni Finance Minister inyakdang, ni Constitutional Amendment Bill ya benoka liasü” ta ashi.
“Ni Union finance minister inyakdang state kar nung Chief Minister temi GST atema ashishitep aser parnok rongnung taoba Gujurat Chief Minister dena liasü. Ajisüaka, parnok teimba kati tajunglen bilema onük kar nung ashishtep. Taoba Gujurat Chief Minister ji tang Prime Minister teinyakdak lir” ta Pranab-isa shisem.
Central Hall nung GST tenzükba sentong nung adenertem rongnung BJP tir Amit Shah, BJP lennir tejen LK Advani aser NCP tanishisang Sharad Pawar nungertem liasü.
Iba sentong nung corporate leader Ratan Tata, actor Amitabh Bachchan aser kentener Lata Mangeshkar aser RSS shisalen sayur S Gurumurthy den power minister Piyush Goyal nungertem aden.
Modi aser Mukherjee nati o jembiba sülen Union Finance Minister Arun Jaitley-ia sentong nung o jembia liasü.
India nüjiso anguba sülen saru saruba maparen nung temelenshi tulutiba Goods and Services Tax (GST) tenzükba sülen, tanü Prime Minister Narendra Modi-i ozüng alema bendanglen sen rizünga ayurtem amokmerenogo.
“Küm ana sülen Switzerland-i India den automatic information exchange asütsü aser idangji nenoki timtem ajurutsü” ta pai ashi.
Institute of Chartered Accountants of India indang Foundation Day sentong nung o jembidang, Modi-i “loktiliba nung rongsenkettsüng jenjang junga ayutsü atema Chartered accountants indang teinyaktsü tulu lir. Doctor temi nübortem meshirangdaktsünüba ama, Chartered accountant temia loktiliba indang rongsenkettsüng jenjang kümzüka ayutsüla” ta metetdaktsü.