India nung Gujarat nunger arishi talangba alir ta ngutetogo

Ahmenabad, November 5 (Agencies) : Gujarat nung alirtem arishi küm 68.7 tashi aliba ngutetogo aser iba ama arishi alibaji linük rangben dang nungi parnok noklang nung shilem 0.8 agi timba lir. 2010 nungi 2014 tashi bushisüngdang ka agiba mapang teburtem dang nungi tetsürtem timba arshia aliba ngutetogo.
Census of India indang osang nung teburtemi arishi küm 66.6 tashi liteter saka tetsüribo arishi küm 71 tashi liteter ta shia lir. 1970 nungi 1975 tashi asadangba nung state nung aliba nisungtemi arishi küm 48.8 tashi ang (average) arshia litetba nguteta liasü.
Ketdangsertemi ashiba agi, küm 40 tsüngda nung state nüburtem arishi küm 20 agi timba süklokogo.
Health commissioner JP Gupta-i, arishi talang aliba ajanga anema aliyim tsütsü junga aliba aser state nüburtem pela aliba sayur, ta ashi.
“Arishi langa alibaji kuli aika ajanga lir aser yangji anema aliba aser libaliro azüoka aliba dena lir. Gujarat nung küm shia tanur lakh 12 asor aser item tanurtem dena state nung nisung lakh 4 küm shia asür,” ta Gupta-i ashi.
State sorkari tanurtem kümzüka aliba tsütsü kanga temulung agütsür aser tanurtem anojungi mesüdaktsütsü atema maneni bendanga agüja inyaktsü, ta Gupta-i ashi.
Kasa osang ajanga ashiba agi, 1971 nungi 2013 tsüngda, küm 42 nung, tanur asoba noklang nung shilem 40 nungi shilem 20.8 tashi aluogo. Kodang asadangdir noklang nung shilem 50 aluogo.
1985 küm tashi küm shia tanur 100 dak tema süa liasü saka tangbo kanga ajema kümogo. Taoba küm 13 nung, 2000 küm tashi tanur asüba noklang nung shilem 62 liasü saka 2013 tashi nung noklang nung shilem 36 ang kümogo, ta kasa osang nung shia lir.
Tanur mesüi intetbaji state sorkari scheme balala tenzüka inyakba ajanga lir. Item scheme tem nung Chiranjivi project-a dena lir, ta ketdangsertemi ashi.