India nung Inactivated Polio Vaccine tenzükogo

New Delhi, November 30, 2015: Hombar nü New Delhi nung Inactivated Polio Vaccine (IPV) tenzükba sentong nung Minister of State for AYUSH (Independent Charge) and Health & Family Welfare, Shripad Yesso Naik-i jembiba noksa nung angur. Noksa nungsa Health & Family Welfare Union Minister, J.P. Nadda, Ministry of Health & Family Welfare Secretary, B.P. Sharma aser DGHS, Dr. Jagdish Prasad nungera angur.

 New Delhi, November 30 (Agencies): New Delhi nung Hombar nü linük atema Inactivated Polio Vaccine (IPV) tenzükogo; Kinü tanur shirnok oral polio vaccine (OPV) asemben jemogo, tangbo parnok nem inactivated polio vaccine (IPV) indang injection ka agütsütsü.

India nunger polio immunization programme tajungba akumtsü nükjidong nung IPV ya tenzükogo. IPV aser OPV senteper tanur ka taküm kümzüka alitsü nung ano taliba yaritsü.

2014 küm March 27 nü India-a polio-free ta kuli süogo, ajisüaka linük nung maneni immunization programme agidar, kechiyong India kidanger linük ana nung tang tashi polio-endemic lir.

Mezüngbubaren shilem nung polio injection ji state trok- Assam, Bihar, Uttar Pradesh, Gujarat, Madhya Pradesh aser Punjab state tem nung agütsütsü.

Tanü iba sentong nung jembidang Health & family welfare Union minister, J.P. Nadda-i, “India nung Polio agi shirangba tatembangbuba case 2011 küm liasü. Ajisüaka tang tashi mesen ‘risk’ lir, kechiyong Pakistan aser Afghanistan na nung iba virus tang tashi lir. Ibayongji polio anema taliba kümzüka alitsü atema onoki IPV tenzüktsür,” ta ashi.

“2016 April tashi nungbo onoki Trivalent nungi Bivalent vaccine agi melentsü,” ta paisa ashi.

Trivalent vaccine ya ajanga polio virus strain asem nungi kümzüker aser bivalent vaccine ajanga strain ana nungi kümzüker. Alima nung Immunization programme tem nung bivalent vaccine agi melener, kechiyong tasembuba strain jibo samatsüogo.

IPV ya vaccine tasen ka masü, aser iba ya 1955 küm mezüng amshia liasü.

Linük 30 nungbo parnok national immunization programme nung IPV tenzükogo aser linük 126 nung kobi melii tenzüktsü.

Tanü iba sentong nung Minister of State for AYUSH (Independent Charge) and Health & Family Welfare, Shripad Yesso Naik-ia jembiba liasü.

Sentong nung Union Minister, J.P. Nadda dak alia Ministry of Health & Family Welfare Secretary, B.P. Sharma, DGHS, Dr. Jagdish Prasad nunger densema sorkar ketdangser aika denogo.