New Delhi, September 21 (Agencies): ISIS-i India nung aliba lanurtem mesüzüktsü meranger ta osang bulua jembiba mapang ka nung tanü Centre sorkari, kiralongrar telok (IS)-i India nung inyakba maparentem sorkari junga mita reprangdar aser nüngdakba meratem agidar, ta ashi.
“Agency temi iba ya kanga junga mita reprangdar. Kodangsa nüngdak adokdir mapa inyaktsü,” ta Minister of State for Home, Kiren Rijiju-i osangbenertem dang ashi.
ISIS den tesentaktep aliba atema Kerala lanur pezü United Arab Emirates nungi anir aruba dak sentakba nung tasüngdangba ka langzüdang pai, “Mapang tetemsü nung onoki mera agitsü,” ta ashi.
Delhi tsür ka ISIS nung adentsü sentong aliba dak sentakba nung Rijiju-i, “Onoki ibaji metetogo. Agency temi mera kar agiogo aser item meraji tim dang ta ni bilemer,” ta ashi.
India nunger lanur pezü ISIS den tesentaktep lir ta temulung melemteti September 15 nü UAE linüki par pezüprong India-i meyipa yokogo, aser maneni India nunger nisung pezü shi meyipa yoktsü sentong lir.
You must be logged in to post a comment Login