India nung ISIS sapur 150 dak tenük yokdar

New Delhi, November 18 (Agencies): India nung kiralongrar telok ISIS nung adentsü jangrar lanur 150 jungnüa dak security agency temi tenük yokdar.
Intelligence agency temi agütsüba report ka ajanga ashiba agi, South India nungi timba ser lanur 150 shii ISIS sapur aser IS maparen atema aria bilemtsür. “Parnok timbaka mapang shia online ajanga ISIS züngsemtem den tongteprateper. Ibayongji onoki parnok ajak security force tem kübok mita repranger,” ta ketdangser kati ashi.
IS telok asoshi raratsü atema tang tashi nung India nunger 23 Iraq aser Syria linük nati ogo. Parnok rongnung nisung trokbo süogo aser ka Mumbai-i shilanga aruogo. Ano IS nung adentsü jangrar India nunger 30 bo Middle-East-i aotsü aliba nokdangtetogo. Tang ISIS telok asoshi teraratak India nunger rongnung, Mumbai, Kalyan nungi lanur ana, Australia nung alir Kashmir nunger ka, Telangana nungi ka, Karnataka nungi ka, Oman nung alir India nunger ka aser Singapore nung alir India nunger ka lir.
Taküm September 15 nü UAE linüki ISIS den tesentaktep lir ta melung melemi India nunger pezü India linüki meyipa yokogo.
Yashi Home Ministry-i, ISIS teloki tawa Paris amakba ajanga par teloki Iraq aser Syria adener tanga tesemtem nunga kiralongraba mapa inyaktsü nükjidong sayur, ta metetdaktsüogo.