India nung ISIS tebilemtsü mali: Rajnath

Hyderabad, November 27 (Agencies): Deobarnü Union Home Minister, Rajnath Singh-i, kiralongrar telok, ISIS ya India nungbo lendong aketba telok ka ama mebilemer, kechiyong India nung aliba Muslim nungertemi pei linük meimer, ta ashi.
“ISIS-i amokmerenba ya asen linük nungbo tebilemtsü onük ka masütsü ama bilemer, kechiyong India nung Islam amangertemi linük meimer,” ta Singh-i ashi.
“Tai makettertemi timtem majurutsü aser aibelenertem shinga danga tai matoktsü ta ni jangjajangja shiogo,” ta paisa shisem.
Sardar Vallabhbhai Patel National Police Academy, Hyderabad nung anogo asemnü DGP Conference nung parnoki security tensa, state police-i ajangshiba tebilemtsü onüktem indang jembiba den külemi kiralongra, cyber-crime, road safety aser airport security onüktem nung o lemtetogo, ta Minister-isa metetdaktsü.
Tan hopta tetenzüklen Lok Sabha nung Minister of State for Home, Hansraj Ahir-i, “Tang tashi nung linük tesem balala nungi National Investigation Agency (NIA) aser linük security agency temi ISIS pusemer 68 puogo,” ta metetdakja liasü.