India nung ITTF World Tour tetoktepba agitsü

New Delhi, December 06 (Agencies): India nung tan mezüngsüa, taruba 2017 küm February ita 16-19 nü tashi International Table Tennis Federation (ITTF) World Tour tetoktepba asayatsü ayongogo.
India-i taoba mapang, 2010 Commonwealth Games asayaba jakdang ITTF tetoktepba ayongba sülenbo tan mezüngsüa ayonga agitsü renemer lir.
Grand Finals dak alaka, 2017 World Tour tetoktepba ayonga agitsü atema alima linük 12 tashi nem dang temeten agüja lir.
Tetoktepba 12 nung asayartem nem World Tour tarensen nung jenjang balala agütsütsü aser iba dak ajemdaker, temaba jenjang 16 ajangzüker asayartem nem dang Grand Finals nung toktepa shilem agitsü temeten agütsütsü.
Grand Finals tetoktepbaji 2017 küm December ita 14-17 nü tashi asayatsü ayonga lir saka asayadakbo tanü tashi melateti lir.
“India nung ITTF tetoktepa ayonga agitsü temeten anguba atema kanga pelar. Iba tetoktepba takok ngua agitsü nükjidong nung onoki terenemshiba tajung agia lir,” ta Table Tennis Federation of India (TTFI) nung Secretary General, Dhanraj Choudhary-ia metetdaktsü.