India nung jenjang tasaktiba hydro electric project Mizoram nung lapoktsü

Aizwal, October 6 (Agencies): Northern Mizoram nung aliba 60 MW Tuirial hydro electric project ya iba ita lapoktsü asoshi imlar. Iba project ya India nung jenjang tasaktiba power project asütsü, ta state BJP ajanga metetdaktsü. Iba project ya yanglutsü asoshi 1988 küm temelaba agütsü aser küm 19 lir tembanga yangluogo. Iba project nungi adokba power unit shia sen 8.44 asütsü koba India nung tasaktiba asütsü, ta BJP ajanga sangdong ka nung metetdaktsü.
Tang state tanga len nungi power unit shia sen 4.25 agi alia amshidar aser kasaji unit shia sen 8.44 agi, ajia state meyong hydel project nungi alitsüba ya rongsenketsüng nung tangar memenepi aliba state Mizoram amala ka asoshi tetsükdaktsü lir.
BJP puri ashiba agi, power jenjang tasak akümba ya project yangluba nung sen aika indokba aser mapang talangka atsülanga inyakba ajanga lir.
Iba project nung indoktsüba sen mezüng ataktetba bo sen crore 368.72 liasü. Iba project ya iba mapang nung yimsütesüdak Congress party aser iba sülen Mizo National Front sorkari mapa küma inyaka moi atsüdaka ayu. MNF sorkar-i yimsü asüba mapang nungbo teyazüla ali küburtemi compensation tali meshiba ajanga iba project ya khen yongi meinyaki aküm, koba nung Chief Minister Zoramthanga’er kinungertem den densema liasü, ta BJP pur sangdong nung metetdaktsü.
Iba sülen tang yimsü tesüdak Congress sorkar-i iba mapa asentenshir tenzükdangbo iba project inyaktsüba jenjang ji crore 1381.71 kümadok aser iba ajanga power jenjang kanga aika aküm. Ajisüaka Tuirial nungi adokdaktsüba power shilem 12 bo royalty ama Mizoram nem agütsütsü.