India nung judicial system tashi itdaktsütsüla

India nung judicial inyakyim nung metokmeperi reprangshimtsü atema sorkari mapa kar inyaktsüla ta taoba Deobarnü sentong ka nung Chief Justice of India, Tirath Singh Thakur-i pa tenük nungi nüktzü alua Prime Minister Narendra Modi dang mepishia jembiogo. India nung ozüngren dak sendakba maparen aika melenshitsü aser jenjang yanglushitsüsa lir. Tang tashi nung linük nung ken o crore 3 den timba okadak benokba ano mangadangi bendena lir, iba asoshi judiciary aser sorkar na külemi lenmang ka bushitsü nüngdaker. India nung tang obendanger 18,000 shi ka lir, saka küm 30 tejaklen Law Commission-i linük nung obendanger 40,000 nüngdaker ta asadangtetba metetdakja lir. Ano, 2014 küm Law Commission-i asadangba ka nung high court balala nung benoka aliba ken o tem dang angadangtsü atema obendanger 1,000 nüngdaker ta bushitetba osang metetdaktsü. Yaküm tashi nung lower courts nung ken o mangadangi aliba noklang nung shilem 10.83 ji küm 10 tejaklen indang liasü aser shilem 18.1 ji küm 5-10 tashi indang liasü ta National Judicial Data Grid-ia metetdaktsüogo. India kübok okadak balala nung ken o benoka alibatem nung densema aliba telok tulutibaji sorkar lir. Okadak ken o benoka aliba noklang nung shilem 70 jungnüa nung Centre aser state sorkartem dena lir. Chief Justice of India T.S. Thakur-i iba onük jembiba sülen anogo ka lir The Telegraph-i bushisüngdang ka asüba nung Gauhati High Court nunga ken o 25,483 ano mangadangi aliba bushitet. Shitakba agibo Gauhati High Court nung obendanger 24 alitsü lemzükja lir saka iba nung jagi obendanger 10 indang menden tazüng lir. Iba khuretji ajanga Assam nung judicial system ajungalen tetsükdaktsü ajurur ta ketdangser kati metetdaktsü. March 21, 2016 tashi nung Assam nung district court tem nunga obendanger 424 lemzükja aliba nungi menden 106 tazüng liasü. Meghalaya High Court nunga obendanger 4 lemzükja aliba nungi menden ana tazüng lir. ‘Judicial systemji Northeast nung tamajungtiba. Asen tesem nung lower aser higher judiciary nung obendangertem agi anünger” ta senior additional advocate-general of Assam-i ashi. Tripura aser Manipur high court tem nunga obendanger lemzüktsüba ama lir saka lower courts nungbo peria mali. Ano, Mizoram nunga obendanger 33, Nagaland nung 3 aser Arunachal Pradesh nung menden ana tazüng lir ta The Telegraph osang nung metetdaktsüogo. Anogoshia Gauhati High Court nung division bench ana amener saka obendanger peria maliba ajanga division bench ka anogo piyong aser ka anogo tesadang ka atema dang amener ta Gauhati High Court Bar Association general secretary-i ashi. Iba ya ajanga Kohima, Aizawl aser Itanagar nung aliba bench tem nung tetsükdaktsü ajurur. Obendanger peria maliba ajanga Gauhati High Court indang kongsangtem nung mapang shitak nung ken o mangadangteter ta paisa shisem. April 22, 2016 nü Gauhati High Court Judge, Justice LS Jamir-ia Nagaland nung High Court balaka tentettsü atema tebilemba lemsatepogo. State nung High Court balaka aliba ajanga ozüng aser temeten dak sendakba maparen tajungba akümtsü aser ibaji ajanga nübortem asoshi maongka aser tajangzük bener arutsütsü, ta pai ashi. Atangji linük ka nung judicial system tashi tait asütsüla, kechiyong iba jagi dang linük ka azüokteter aser nübortem tiptema lidaktsür. India ama democracy ka nung judicial system takang ka alitsü nüngdaker aser ken o tem angadangtsü atema obendangertem peria ayutsüla aser okadaktema peria lapoktsüla. Aji dang masü, India linük nung tang yanglua aliba ozüngtem meyipa reprangshia yanglushitsüla aser ano ozüng tesashi kar yanglusemtsüla, kechiyong nisungtem, sobaliba, tamangba yimsü aser tangatetba temeyoktep aliba lokti ka nung judicial system takang ka alitsü kanga nüngdak.