India nung Khristanpur anemba shilem 57 agi timba aküm

New Delhi, Metsüremi/March 06 (Agencies): Küm tenzüker ita ana tsüngta India nung Khristanpur anema mapa tamajung inyakba ya taoba küm kasa mapang dang shilem 57 agi timba kümogo, ta advocacy telok ka ajanga ashi.
India nung January aser February ita Khristanpur anema mapa tamajung inyakba 77 tashi Evangelical Fellowship of India’s Religious Liberty Commission (EFIRLC) ajanga bushitet aser taoba küm kasa mapang tatalokba 49 liasü. Item tatalokba rongnung Odisha nung Khristan ka aser Chhattisgarh state nunga Khristanpur ka February ita tepsetba dena lir.
“Asür anaprong ya arishi küm 40 shi lir aser yimsü mechi tepset ta amangtsü kuli lir. Khristanpur loktiliba nung timtem ajuruba aser parnok yimtsüng nungi aridokba den ano tensa kar nungbo parnok taküm kümzüktsü mechi pei alidak tesem toktsür jena ao,” ta EFI nung general secretary Rev. Vijayesh Lal-i Morning Star News dang ashi.
Tatalokba 77 rongnungi 16 Tamil Nadu state nung atalok, 12 Uttar Pradesh nung atalok, Maharashtra nung trok aser Chhattisgarh nung pongu atalok ta parnoki ngutet, Andhra Pradesh, Bihar, Jharkhand aser Kerala state tem nunga pezü-zü aser tanga state tem nunga ataloka liasü, ta Lal-i ashi.
2018 küm mezüng ita ana nung atalokba 49 ama 2017 küma kasa mapang 50 ben ataloka liasü.
Uttar Pradesh nung Khristanpuri timtem ajangshiba ka nung taküm January 13 nü tetsür police ketdangsertemi Deobarnü tekülem sentep nung timtem agüja tetsür pezü aser tebur ka apu, aser parnok rongnung tekülem sentep anir tetsür pastor densema liasü. Police station nung tetsür police ketdangser kati tetsür pastor Sindhu Bharti dak züka merenshi, aser lai kecha memeteti aküm.
“La asaa süchia ao ta police temi bilema la tepang nung süngu tatsük inoktsü. Ibajagi la dak temelenshi majitet nung la tejak nung tzü temokong marok ana mükepoktsü,” ta tenük kuli alir Madhu Bharati-i Morning Star News dang ashi.
Pua alirtem yagi tamangba yimsü tsütsü tangar mulung yirutsü, tekülem agiba tesem menentsü aser rongrong adokdaktsü ta ken o benok. Khristan lennirtem arua jembiba sülen police temi pua alir tetsür Khristanpur chiok, saka teburtem ya judicial custody nung yua lir.
Pastor Bharti ya temang yiruba atema mozükidang temang anepalutsüsa aküm.
Odisha aser Chhattisgarh nung Khristanpur ana Maoists temi tepsetba ya iba tesem nung alir tribal nisungtemi ajungmesoa tepsetdaktsüba lir.
“Chhattisgarh kübok Kohkameta yimtsüng nungi Munglu Ram Nureti tepsetba ya pai Khristan yimsü agizükba maginü police nem osang agütsür ta Maoists nem osang tiazü sangoktsü,” ta Lal-i ashi.
“Odisha kübok Nabarangpur tesem nung Anant Ram Gond tepsetba ya kasa yimya nung tepset. Pa tamangba yimsü mechi tamalena timtem ajurur liasü. Pa Khristanpur akümba mepela yimdaklirtemi pa ya police indang osangbener ta Maoists dang shir tepsetdaktsü,” ta paisa ashi.
Gond ya pa indang tamangba yimsü mechi loktiliba nungi sendoka yimtsüng tezülen aliba mapang iba lendong ya atalok, ta Lal-i ashi.
“Mapang kar nungbo Khristanpur ya Hindu nunger tekülem kidangi anir oa Hindu nunger tekülem agiba mapang jembiba o tem jembidaktsü aser parnok tamangba yimsü melena temenen menaba asoshi tatok meshidaktsü,” ta pai Morning Star News dang ashi.
Navsari, Gujarat aser Tamil Nadu kübok Tirunelveli anasa Alangulam yimtsüng nung Khristanpur anema nüburtemi banner tem inokba osang lir. Navsari nung banner inokba ajanga Khristanpur jilai aitba nokdang, aser Tamil Nadu nung inokba ya Hindu Munnani temi inyakba amai lir, kong Hindu nunger dang yimtsüng nung tamangba yimsü indang sayutsüngiba anema nokdaktsü shia liasü, ta Rev. Vijayesh Lal-i ashi.
January ita nunga Khristanpur anema iba ama mapa tamajung 29 ben inyaka liasü, ta Khristanpur nem legal advocacy agütsüba telok, Alliance Defending Freedom-India ajanga February 19 nü shia liasü.