India nung Khristantem reshikangshiba khukhua aitsür: NJCF

Dimapur, December 22 (TYO): India kübok tesem balala nung Khristantem Khristmas amungdang reshikangshiba aser teka sangshiba inyakyim khukhua aitsür ta Nagaland Joint Christian Forum (NJCF)-i metetdaktsü
Khristmas mongpu nung Khristantem dak tenük yokba mapa inyakba angudang kanga jashir. Tawa India nung Khristantem aser ano telok tilatem reshikangshiba aser anema mapa inyakba kanga bulua ataloker aser iba atema NJCF-i khuret abener, ta president Rev. Dr. Zelhou Keyho-i sangdong ka nung metetdaktsü.
Yaküm Khristantem benjung raksatsütsü atema Khristmas anogo Good Governance Day kümdaktsü. Iba atema India kübok tesem ajak nungi Khristantemi ola adokba ajanga tanü iba anogomung indang osang kecha mangashir, saka taküm Khristmas amungertem anema mapa inyakba aser lendong agütsüba tatalokba aika ajuruogo, ta paisa ashi.
“Khristantem dak ‘tashiyim agi temulung meyipdaktsür’ ta tai tongloktsür. Pelatepa kentena senzüba mesüra benjungtepa senzübaji ‘tashiyim agi temulung meyipdaktsüba’ asü? Khristantemi tanga tamangba yimsü benjungtem kodanga menokdanger, anungji India nung tamangba yimsü telok tulutemi telok tilatem dang nungi taremzükba aser ajemaluba angazüktsüla,” ta Rev. Zelhou-isa asüngdang.
Küm aika ‘tashiyim agi temulung meyipdaktsür’ ta asüba tiyazü onük ajanga onok reskikangshia arur. Onoki timtem aser okrongba jenti arema aruogo, anungji joko iba inyakyim anenang ta ayimoktsür. Telok tulubai telok tilaba ola nembanga meyutettsü kechiyong onok nem temzüng ajanga temelaba agütsür.
“Hindu nunger ama Khristantema kasa temeten lir, anungji yimsüsürtemi yimten tsütsü ajangzüktsü atema loktiliba nung telemsa adokdakja mapa inyakba anentsüla. Nenoki linük nung Khristantem reshikangshiba mazüoktetra, nenoki tanü linük nung tensa ya adokdaktsü ta tai tongloktsütsü. Nenok ket nung tashi lir, anungji Khristantem ama telok tilatem reshikangshiba anendakjang ta onoki mepishir,” ta Rev. Zelhou-isa ashi.
India kübok tangalen alirtem dang nungi asenokbo talenba balaka mali amangteter, anungji asenoki Khristmas mapang tangartem asoshi sarasademtsüdi aser asenok yimtenren mapatem ajanga manisadaktsütsü asoshi kümdanga lidi ta ayongzüker, ta Rev. Dr. Zelhou-isa ashi.