India nung Khristantem reshikangshiba onük atema UK-i inyaktsü

London, May 17 (Agencies): India nung Khristantem kanga reshikangshiba osangtem Foreign Office-i reprangshiba sülen Theresa May sorkari, India nung Khristantem reshikangshiba atema UK-i India ketdangsertem den jembia inyaktsü, ta metetdaktsüogo.
House of Commons nung Foreign Office tasüngdangbatem mapang nung David Linden-i (Scottish National Party züngsem), India nung Khristantem anema inyakba kanga buldar, ta metetdaktsü.
Ibaji langzüa Foreign Office minister Mark Field-i, “Khristantem reshikangshiba linük aika rongnung atangji India densema lir aser tamajungba akümer. Züngsemtemi metetdaktsüba onük atema onoki consular level nung inyaktsü,” ta metetdaktsü.
Truro nung bishop-i Foreign Office-i alima tesem ajaklen reshikangshi tia ajuruba Khristantem atema inyakba osang metetdakja foreign secretary Jeremy Hunt nem report agütsü.
Iba report nung shia aliba agi, Chhattisgarh, Maharashtra, Odisha, Madhya Pradesh, Uttar Pradesh, Jharkhand aser Telangana state tem nung loktii Khristantem anema inyaker aser Khristantem Hindu yimsüi meyipdaktsütsü meranger, iba denji külemi tetsürtem anema inyaker aser tepseter.
Hunt-i, “Ni Truro nung Bishop dang report tejangja agüjang ta metetdaktsüogo,” ta ashi.
“Pei tamangba yimsü nung ajemdaker nisung kar sempapa ya akhi tejen putu yimya mesüker. Iba ya kanga bulua akümer ta meteta asenok ajak aoksar,” ta Hunt-isa metetdaktsü.
Open Doors’ global watch-list nung alima nung Khristantem tamajungtiba reshikangshiba linük 50 indang campaign tenzükba sentong nung Hunt-i, India nung item ama atalokba atema London-i inyaktsüla, ta ashi.
Tang mezüng Open Doors’ global watch-list nung alima nung Khristantem tamajungtiba reshikangshiba linük 10 rongnung India desema lir.