India nung Khristantemi Ato kilonser, Modi dangi shidi ka zülu

September 28, 2017: India nung Catholics bishop temi shidi ka ajanga yimjak nung Ato kilonser, Narendra Modi dang linük anüdoklen Khristantem anema inyakba indang metetdaktsü; Iba state ji Modi’er Hindu nationalist Bharatiya Janata Party-i yimsüsüba state lir.
Shidi nungji Hindu nationalist temi cardinal noksa ka den Kangki tulu ka rongdokba noksa ka densema liasü.
Catholic Bishops’ Conference of India-i shidi ajanga Modi dang Jharkhand Chief Minister, Raghubar Das-i tesempa prokba aser Hindu nationalist telok, Hindu the Jagran Manch (Hindu Revival Group)-i tawa Cardinal Telesphore Toppo indang noksa ka rongdokba indang metetdaktsü.
CBCI Secretary General, Bishop Theodore Mascarenhas-i sign süa aliba shidi nungji, state sorkari Catholic Arogo ya tsükchir ama züngshir, kechiyong Khristantemi tribal nisungtem indang ali temeten bushir, ta shia lir.
Cardinal Telesphore Toppo indang noksa den Kangki rongdoktsüba indang noksa nungji Bishop Mascarenhas-i yamai zülua lir, “taoksatsüka aser tetsübutsüka.”‘
Shidi nungjisa, “Khristantem anema tesempa mapa inyakertem jagi parnoki kechi inyakerar memeteter, parnoki nüburtem kongi anirar memeteter; tesempa aser telemsa adokdaktsüba lenmangi anir,” ta shia lir.
“Onok indang chief minister-i jakdaka tesempa metsüh proker aser lokti nung tesünep raksatsür. Iba ya tagizüktetla masü,” ta bishop-i ashi.
Jharkhand state nung nütsüng million 27 lir, aser iba nungjagi nütsüng shilem 5 shi dang Khristantem lir.
Tamangba yimsü meyipdaktsüba nokdangtsü atema taoba ita Jharkhand Assembly nung bill ka agizükogo. “Anti-conversion” law ta ajaba, Religious Freedom Bill, 2017 ajanga ashiba agi, nisung ka tashiyim agi tamangba yimsü meyipdaktsütsü memelar, iba den külemi Khristan kati Molumi mesüra Tsüngremer obendang indang jembitsü makok.
2017 küm mezüngbuba ita asem nung linük nung tamangba yimsü anema inyakba tatalokba 248 liasü aser June ita tatemlen tashi nungbo tatalokba 410 jungadok, ta tawa Open Doors osang ajanga metetdaktsü.
2016 küm nungbo item ama tatalokba 441 dand liasü.