India nung ki talangtiba Guwahati nung yanglutsü

Chennai, Aenjeti 9 (Agencies): Assam sorkari Guwahati nung Global Trade Centre ka yanglutsüba tenzükogo, aser iba ya Southeast Asia linük tem den shishilembaba tsütsü sendakteptsüba asoshi sentong balala yangluba nung shilem ka lir, ta Chief Minister Sarbananda Sonowal-i ashi.
‘Advantage Assam’ road show ka nung shilem agidang Tamil Nadu nungi shishilembartem taruba ita Guwahati nung mezüngbuba Global Investors’ Summit akatsü aliba nung arua shilem agitsüba atema jaoka Sonowal-i ashiba agi, parnoki iba ki ya asü tenzükogo.
“Iba ki ya azüklen 65 ben amentepa atuba aser ki ana atongtepa yangluba ki ka asütsü, aser iba ya Guwahati nung yanglutsü. Iba centre ya Southeast Asia den shishilembaba tsütsü tesendaktep indang temaitsü ka asütsü,” ta pai ashi.
Sonowal-isa ashiba agi, par sorkari Barak ayong merak tenzükogo aser Brahmaputra ayong tekaratiba nung merak tenzüktsü.
“Onoki Brahmaputra ayong ajanga Chittagong port den sendakteptsü asoshi benokdangogo. Ayongküm nung aliba port yimtitem nung sen indoktsüba aser terenlok bener arutsüba atema sentong yangluogo,” ta paisa ashi.
Raliwaliba tsütsü lenmang sadema aliba reprangteta, Chief Minister-i ashiba agi, pai aniba sorkari tourism units atema tax incentives aser capital subsidy agütsütsüba sangdongogo.
Maneni osangbenertem den sensaksemdang pai ashiba agi, sorkari, Information Technology, plastics aser petrochemicals, pharmaceuticals aser raliwaliba tsütsü terenlok asoshi sen indoktsü asoshi reprangshimdar.