India nung kiralongrar tentet tulubaji RSS: S M Mushrif

Kolkata, Nov. 27 (Agencies): Taoba mapang Maharashtra nung Inspector General of Police (IGP), S M Mushrif-i, RSS ya India nung kiralongrar tentet tuluba lir, ta ashi.
Times Of India osang ajanga ashiba agi, Brihostibarnü Mushrif-i, “RSS züngsemtem anema kiralongraba ken o tajemba agi 13 benoka lir, kong parnoki RDX bomb amshi. Bajrang Dal ama tentet-a züngsemra item ama ken oji 17 tashi atutsü,” ta ashi.
2007 küm Hyderabad nung Mecca Masjid bomb lendong, 2006 aser 2008 küm Maharashtra nung Malegaon bomb lendong aser 2007 küm Samjhauta Express bomb lendong agütsüba densema item ama tatalokbatem tetshia taoba IGP-i, “India nung kiralongrar tentet tulubaji RSS, iba nung ya tarendaktsü kecha mali,” ta ashi.
Paisa, iba “kiralongrar telok” ya sorkar tashi nung aliba party den sendakteptsü kecha mali, ta ashi. “Kiralongrar tentet ka ama RSS ya yimtenren tashi nung teinyaktsü kecha mali. Sorkar yimsüsüba telok ka den parnok sendakteptsü nüngdak madoker. Iba ya inyakyim indang lir, Brahminical inyakyim. Ni kodang Brahminical ta jembir, iba tetezü Brahmin masü, iba ya tangatetba shisatsü, amokbangnüba aser ambangyima tashi amshinüba,” ta Mushrif-isa shisem.
Linük nung akhümtsübutep maliba onük nung Mushrif-i, “Akhümtsübutep ya mapang talangka nungi mali. Tamalena tatalokba tulu aika liasü, iba ya kechiba tangang jembir’ar ni mangateter,” ta ashi.
Paisa ashiba agi, tali bilemoka inyaker Hindu nunger kiralongraba nung densema aliba ken o bushisüngdanger, Hemant Karkare tepsetbaji Intelligence Bureau (IB) ajanga lir.
Karkare ya 2008 küm kiralongrartemi Mumbai amakba mapang tepset.