India nung küm 3-4 shia sen nung ‘security’ tamaitsü melenshitsü

New Delhi, April 2 (Agencies) : Sen taila amshiba inyakyim nokdangtsü atema sorkari küm 3-4 nung khen sen 2,000 aser sen 500 melenshia menüngtsü sentong lir.
Yaküm demonetisation asüba sülen tesüiba ita pezü tsüngda Indian currency notes taila aika ngutetba agi iba mapa ya inyaktsü atema sentong atonger.
Brihostibarnü Union Home Secretary Rajiv Mehrishi dena Finance aser Home ministry nungi tongti ketdangsertem kanga dang temaba jenjang nung senden ka amendang iba tebilemba ya lemsatepa liasü.
Alima nung ‘developed countries’ teimba ka nung küm 3-4 sülen sen nung security features melenshir, anungji India nunga iba inyakyim ya tenzüktsü nung ajungtsü, ta senden nung Home Ministry ketdangsertemi ashi.
Yaküm demonetisation masü tashi India nung jenjang temaba shidi sentem nung temelenshi mesüi dang aru. Sen 1,000 note ya 2000 küm mezüng adok saka temelenshi kecha balaka maliasü. Ano, 1987 küm sen 500 note tejenba mezüng adok saka küm 10 shi tejakdang ang khen melenshia liasü.
Sen 500 note melenshiba nungjia ‘security features’ talila maliasü aser sen 1,000 aser sen 500 note tem den kasa dang liasü, ta ketdangsertemi ashi.
Tawa linük nung taila sen apuba jungjunga tendanga reprangdang sen 2000 note tasenba nung enokba ‘security features’ 17 nungi 11 bo kasa ajizüka yanglur aliba bushitet, ta ketdangsertemisa metetdaktsü.
Küm 3-4 shia security tamaitsütem melenshiba ajanga taila sen amshiba inyakyim azüoktettsü, ta parnokisa ashi.
Tawa taila sen bena lia apurtem dang asüngdangya asüdang, sen 2000 note ji Pakistan nung Inter-Services Intelligence (ISI) teyari agia menüng aser Bangladesh ajanga bener aru ta nangzük.
Indian Statistical Institute, Kolkata-i bushitetba agi, 2016 küm India nunger taila sen amshibaji sen crore 400 liasü.