India nung lenmang masü asen mulung memerük: Tir Pranab

December 01, 2015 nü Linük Tir, Pranab Mukherjee-i Ahmedabad, Gujarat nung aliba Sabarmati Ashram semdangba noksa nung angur. Kasa noksa nung Gujarat Angh, O.P. Kohli aser Gujarat Chief Minister, Anandiben Patel nata angur.

Sabarmati, Ahmedabad, December 01, 2015 (Agencies): India Tir, Pranab Mukherjee-i, “shitakba janaji gari lenmang nung masü saka asen mulungjang nung lir koba ajanga tajung majung mebendaktetter aser lokti nung telemsa adoker,” ta Mongulbarnü Swachh Bharat Mission sentong nung ashi.

Mahatma Gandhi küm 12 lia ‘dandi march’ tenzükba tesem, Sabarmati Ashram nung ‘archives & research centre’ ka lapokba mapang, Tir Pranab-i, “Ajaki tushitetba mapa tajung inyakteta, temulungsentsü temerük agi ‘Swatch Bharat Mission’ agizükdi,” ta ashi.

“Iba sentong ya tetenzüker sür asenok nisung shiai pei mulungjang merükteta tapu ajak nung Gandhi nükla ataloktsütsüla,” ta pai ashi.

Asenok dang Gandhi-i, tai tongloktsütepba aser meimchir temeten anemtepba ajanga chijiba Swachh Bharat bener marutettsü, ta ashiba Pranab-i metetdaktsü.

Tawa linük nung akhüm metsübutepba onük ajanga kanga mangatetep adokba dak sentakba nung Tir Pranab Mukherjee-i, “Anogo shia kodanga bilema maliba mangatettep, asenok meküta adaklokba angur,” ta ashi.

“Iba ama tensa ajanga ammang aser tetsübu bentsür aruba den kati ka dak temulung melemteter. Anungji iba mapang asenoki olemtep tajung, tebilemba tajung aser non-violence tashi mamatsüla,” ta pai ashi.

“Ahimsa (non-violence) ya tim masüba inyakyim ka masü. Ahimsa ajanga tajung tamajung angatetdakja asen shisatsü sangwadaktsür. Gurudev Tagore aser Mahatma Gandhi nati iba tesawang mezüng bener aru anungji iba tesangwa ajanga asenok maneni len anidaktsütsüla,” ta Tiri ashi.

Pranab-i, Tsüngrem dak amanger shingaia nisüng metepseter. Ochi nung nangrikanger alirtem, shirnok Tsüngrem lartem lir, parnoki tangar taküm magir saka pei taküm ang tenlar,” ta ashi.

“Linük nübur ajaki o aser tashiyim agi kati ka anema inyakba nungi pila alitsü nüngdaker. Non-violent lokti-i dang democracy nung shilem agitettsü. Alima nung tesüiba mapang dang nungia tang ang Gandhi kanga tenüngdakba kümogo,” ta pai shisem.