India nung meimchirtem temeten jenjang tamajungba akumer

Washington/New Delhi, June 09 (Agencies): Modi sorkari küm ana yimsüsüba mapang meimchirtem temetentem aser tamangba yimsü balala sadoka benshiba jenjang tamajungba akumer, ta shia meimchir temeten atema inyakertemi iba onük ya US-i India den ken o jembiba nung dendaktsütsüla, ta ashi.

Asia Advocacy Director, Human Rights Watch, John Sifton-i, “Modi sorkari senso ajak nem ochi temeten agütsütsü, tamangba loktitem kümzüktsü aser melung masürtemi sadoka jembitsü atema mera tajungba agia meinyak nungbo India nung meimchir temetentem jenjang tamajungba akumtsü,” ta ashi.

Mongolbarnü Tom Lantos Human Rights Commission-i ayongzükba “Challenges & Opportunities: The Advancement of Human Rights in India” onük angadangba mapang Sifton-i, ozüngtem aser mapatongtem junga mebenokteter aser iba ya tayongzükba ka lir, ta metetdaktsü.

Meimchirtem temeten anema inyakba atema ozüngtem ajanga police aser tanga sepaitem nem temerenshi magütsür aser sorkar ketdangserten anema meinyaker, ta pai ashi.

Mongolbarnü White House nung Ato kilonser, Narendra Modi-i US Tir, Barack Obama ajuruba sülen kobi melii Sifton-i, “India sorkar den item tongtibang onüktem jembitsü aser taruba ita-anogotem aser kümtem nung India sorkar den odiodia shisalemsateptsü atema onoki Congress züngsemtemi US dang iba atema mepishidaktsüner,” ta ashi.

Kasa sentong nung International Christian Concern Tir, Jeff King-i, “Item ozüng alema benshibatem nungji India sorkar densema mali, ajisüaka Ato kilonser Modi aser sorkar ketdangsertemi ola madokba ya majung,” ta ashi.

Indian American Muslim Council nungi Musaddique Thange-ia, “Strategic aser Commercial Dialogue ji security, defence aser rongsenkettsüng nung yaritepba dak alia asütsüla, koba ajanga linük anaprong democracy,  yimsü sadoka amangtetba aser ozüng benokba nung tashitaitba akumtsü,” ta ashi.

Iba dialogue ajanga, US-i India ketdangsertem dang tamangba lokti nung minority tem kümzüka ayutsü, tamangba yimsü sadoka amangtettsü aser tamangba dak sentakba nung ozüng alema inyakba atema ochi obendang akatsü, aser ochimashi jungkai adoktsürtem kümzüka ayutsü atema ozüngtem yanglutsü nüngdak ta ajungshitsüla, ta paisa ashi.

Human Trafficking Pro Bono Legal Centre Tir, Martina E Vandenberg-ia, meimchirtem shibelenba atema India-i mera takhang meyanglutetba atema 2016 Trafficking in Persons Report nung India ji ‘Tier 3’ jenjang nung adoktsütsüla, ta takhangba agütsü.

Tawa U.S. Commission on International Religious Freedom report ajanga, “2015 küm India nung tamangba yimsü balala akümtsübutepa aliba jenjang tamajungba kümogo aser tamangba yimsü sadoka amangtsü temeten alema inyakba tali kümogo. Hindu Nationalist teloktemi minority tem, talisa Khristan tem, Muslim nungertem aser Sikhs nunger anema inyakba tatalokba jenti lir,” ta shia lir.