India nung mezüngbuba ‘organic state’ ji Sikkim: Modi

Jan. 18, 2016 nü Sikkim yimtiba Gangtok nung PM, Modi-i Sikkim nung tsünütetba Rochid naro tapu asem sayatsüdang agiba noksa angur. Noksa nungsa Sikkim Angh Shriniwas Dadasaheb Patil (achijilen) aser CM, Pawan Kumar Chamling nata angur.

Gangtok, January 18 (Agencies): Sikkim state-i terenlok mapa inyakba aser lipoküm wazüka ayutsü atema mapa tajung inyakba ajiteta Hombarnü Prime Minister Narendra Modi-i Sikkim ji India nung mezüngbuba ‘organic state’ ta tenüng jaloktsüogo.
Sikkim yimtiba Gangtok nung sustainable agriculture atema national conference nung o jembidang, Modi-i India nung tsünüsenbongtsü aser aluyimba inyakyim khenyongi balaka melenshitsü indang jembi.
“State ajunga nungi agriculture minister tem den ni yangi arua lir. Asenoki India nung tsünüsenbongba inyakyim melenshitsü atema adenshia lir. Tan mezüngbuba atema iba mesükba olemtep akar aser iba mungdang nung tebilemba tasen aser alizüng tasentem den senotsü onük kar lemsateptsü” ta Prime Minister-isa ashi.
State kar nung aluyimba aser tsünüsenbongba maparen jenjang ajungkettsü tashi lir, ta paisa shisem.
Modi-isa Sikkim-i organic farming nung temulung agüja inyakba atema tenüngsang agütsü aser iba dak sendakba nung Sikkim-i tanga state ajak ajateta mapa inyaktetogo, ta paisa ashi.
“Küm ter tejakdang organic farming indang tebilemba lemsatepdang nisung karibo iba tebilemba anema noktaker asütsü. Kanga dang meranga inyakba aser tebilemba ka nung tamang kar inyaktetba tanü asenok tenük agi angur” ta paisa metetdaktsü.
Sikkim ya alima atema ‘model state’ ka lir aser lipoküm meraksadaktsüi state-i terenlok mapa inyaker, ta Modi-isa shisem.
“Linük ajaki asenok libaliro melenshitsüla ta mulunga agizükogo. Asenoki alima meimtsüla. COP21 nung asenoki alima meima angtsü atema telemtetba agi aser Sikkim-i ibaji mapa inyaka sayuogo” ta Modi-isa ashi.
Tanü Prime Minister-i Gangtok nung flower show reprang aser idakji pai Orchid naro tapu ana nem tenüng jaloktsü. Iba Orchid ya Sikkim nung anepalua pongdaktsüba lir aser Modi-i Cymbidium Sardar aser Lycaste Deendayal ta tenüng jaloktsü.
Iba kasa sentong nung Sikkim Chief Minister Pawan Chamling-i naro tasembuba nem Modi nüngtem nung Cymbidium Namo ta tenüng jatsü.
Prime Minister Modi-i anogo ananü atema northeast semdangi arua lir aser asüng pai Assam semdangtsü aser idak nungjagi northeast state balala nung aliba IIT, NIT aser central university kaketshirtem den sensaksemtsü.
“Asüng ni Assam semdangtsü aser iba mapang ni Assam nunger lanur ase Northeast nung aliba IIT, NIT & central university kaketshirtem den sensaksemtsü. Asüng ni Kokrajhar nung lisopur kintem senden ka nung aser Khanapara, Guwahati nung youth rally ka nung o jembitsü” ta Prime Minister-i Twitter ajanga lemsatepogo.