India nung mezüngbuba Zika Virus vaccine yangluogo ta kuli agütsür

Hyderabad, February 3 (Agencies) : Hyderabad nung Bharat Biotech ta ser vaccines & bio-therapeutic yangluba company kati Zika Virus den raratsü atema alima nung mezüngbuba vaccine yangluogo ta Bodbarnü osang metetdaktsü.
Parnoki Zika Virus den raratsü asoshi vaccine ka dang masü saka ana tashi yangluteta lir, ta metetdaktsüogo.
World Health Organisation (WHO)-i Zika tashidakji ‘global health emergency’ ka ta sangdongogo. Latin America nung linük 20 den teimba nung iba tashidak aliba osang sangoktsüogo aser Texas, USA nunga shi nung medemba ajanga Zika virus menazükba osang ka tanü metetdaktsü.
Alimai, iba tashidak den raratsü atema vaccine bushitepba mapang ka nung Hyderabad nung aliba Bharat Biotech International Limited-i Zika vaccine yanglutetba osang metetdaktsü.
“Zika atema onok ya vaccine company mezüngbuba asütsü, kechiyong ita tuku tejaklen onoki iba tashidak atema vaccine candidate patent agütsü” ta Bharat Biotech Ltd. Chairman & Managing Director, Dr. Krishna Ella-i ashi.
Zika virus taküm ka tangalen nungi bener aruba sülen Hyderabad nung company-i candidate vaccines ana yanglutetogo, saka item vaccine ji mozü aser nisung dak tendangtsü atema mapang agitsü.
Dr Ella-i ashiba agi, iba mapa asoshi pai sorkar dang nungi teyari meshi aser Indian Council of Medical Research (ICMR)-ia yariteptsü nangzükogo.
“Bharat Biotech ket nung Zika vaccine candidate aliba osang onok dang sangoktsüogo. Onoki iba ya scientific tsütsü nungi reprangtsü aser takok ngua amshitettsü atema shisadangtsü. Iba ya Make in India indang tatishitsü tajung ka lir” ta Director General, ICMR, Dr. Soumya Swaminathan-i osangbener dang ashi.
Par company-i ita pezü tsüngda vaccine dose million ka yanglutettsü ta Dr Ella-isa metetdaktsü.
“Iba vaccine tajungba küma yanglutsü asoshi Prime Minister Narendra Modi-i mapa inyaktsüla. Iba dak sendakba mapa inyaktsü asoshi talenbatem salatsüla aser India-i BRICS (Brazil, Russia, India, China & South Africa) telok nung Brazil amala linük yaritettsü” ta paisa ashi.
“Prime Minister-i mapatong agizüka inyaktsüla kechiyong ibaji ajanga Brazil aser Colombia linüktem den asenoki ‘vaccine diplomacy’ inyaktettsü. Asenok BRICS telok nung züngsema lir aser asenoki parnok yaritsüla. Onoki parnok yarinür aser global public health ajangzüktsü atema inyaknür” ta Dr Ella-isa metetdaktsü.
Tashidak aser mozü nung mongin nisungtemi Bharat Biotech-i senzüka toktsüba tashidak ka atema talangka bilema oa vaccine yanglutsü tenzükba atema tenüngsang agütsür.