India nung nashi yokyayokjiba soter

New Delhi, May 26 (Agencies): Brihostibarnü Ministry of Environment and Forests-i Prevention of Cruelty to Animals Act kübok tetuyuba tasen kar agütsüogo.
Iba Act kübok linük ajungalen shishilembadak nashi ayoktsü atema tepsetba nokdanger.
Ministry of Environment and Forests-i tetuyuba agütsüba rongnung kaji cattle business indang lir aser iba nung shiruru shishilembatsübaji alu kiburtem tsüngda dang asütsü ta shia lir. Iba tetuyuba nung nashi, chang aser ud mesükba alu nung amshiba shirurutem ajak dena lir.
Prevention of Cruelty to Animals (PCA) Act of 1960 nung “shirurutem tepsettsü atema masü saka aluyimdang amshitsü atema dang alitsüla” ta shia lir.
Ozüng tasentemji taruba ita asem tsüngda mapa küma inyaktsü tebilemba lir. Tang nungi talir aser tayokertemi maitsü aser kibur indang kulikakettem amshitsüla.
Nashi ka alizükba sülen, shishilembar kati iba nashi ayokba indang kulikaket pungu yanglutsüla aser ka local revenue office nem, ka talir aliba district nung local veterinary doctor nem, ka animal market committee nem aser tanüngba anaji talir aser tayoker nem agütsütsüla.
Taoba environment minister Anil Madhav Dave-i pa masüdang ozüng tasentem mulunga agizüka liasü, ta ministry osang kar ajanga metetdaktsü.
March 2017 tashi nung India kübok state aser Union territory tem noklang nung shilem 84 tashi nung nashi tepsetba nokdanga aliba osang bushitetogo. Ibaji linük yongsük nung shilem 99.38 shi lir.