India nung nüchiso mali !

British yimli kübok lia arur yimten nüchiso anguba sülen küm 70 ajungba nüchiso anogomong mongaka India nunga India nunger aika tetsübu, tarendak aser talenba kübok nüchiso manguba nübortem den kasasa tia nung aika lir. Item  tiaji angudang India nung Naga nungertem dang masü saka ano India nungertema aika nüchiso manguba tia nung lir ta reprangtetter. Rabindranath Tagore-i ashi ama, shitakba nüchiso aliba lima nungbo sensosangertem mulungjang nung tetsübu tarendak makai pei lima nung senso tajung ka ama nümadangteta senzütsü. Ajisüaka, tanü India lima tia reprangdangra, Northeast nung alirtembo Armed Forces Special Powers Act kübok kodang kechika ataloktsüar memetetba tia nung lir. Ano, anüdoktiptsütsü Jammu & Kashimir tesem nungbo tangsa tensa tia tamajungba kümdagi. Ano, item tensa tia dang nungi tamajungba kaji, India tesem aika nung nashi shi achirtembo sadoksadoka soruchioka mechiyongtetba tia nung lir, kechiyong  tesem aika nung nashi shi ayoktsü aser achitsü memelar. Iba jagi Delhi tashi nunga ki tashi aruagi nashi shi asor asü ta temulung melemteti bilemba agi timtem agütsüba mapa ataloka aruogo. Joko, India tiyonglenbo nashi bener jajatsübaji tetsübutsü mapa ka kümogo, kechiyong nashi bener ooya lira len tom nung soter taochi makai züka merenshitsü aser tasüa sütsütsü. Atangji, India ya kin aser oshi tapu aika jembir alidak alima tulu asünungji, chiyongtsü chiyongba yimya aser sobaliba balala aser yamaji tamangba yimsüa balala lir. Kari shi achir saka karibo machir, shi achirtem rongnunga kari nashishi machir aser kari akshi machir. Item ajakji tamangba yimsü dak sendaka lir, anungji joko ibaji Tsüngremi latettsüba sobaliba amato retreta züngshir. Ibayongji, tamangba yimsü balala amangertem rongnung kati ka akümtsübutepa alitsübaji kanga nüngdak adoker. Ajisüaka, ozü state nungbo nashi shi mechidaktsütsü, ozü state nungbo akshi mamshidaktsütsü aser ozü state nungbo shi kenyongi mechidaktsütsü ta ozüngsa latetra, iba ama state nungjibo tamangba yimsü tapu balala amangertem ajakbo külemi putepa melitettsü. Ibaji dang masü saka joko India nunger karibo India ya Hindustan asünungji Hindu nunger lima akümtsü ta asüba nükjidong nung kanga sashia inyakba agi talisa Muslim aser Khristan purtem sadoksadoka meliteti kümogo. Linük temzüng nung aliba ama, India nung ya India nunger senso shia nem pei amangnütsü amangtsü asoshi shiktakba nüchiso agütsütsüla. Aji oda, chiyongtsüa pei chinüba achitsü asoshi nüchiso agütsütsüla. Iba kasaji senso shia yimten  nungi kechi angutsü tim aji, kin tila tulu mebendangi, angutsü tim. Ajisüaka, tanü ama India nung tamangba yimsü ka dang amangtsü aser school nunga yamaji tamangba yimsü ka tsütsü atsünga sayutsü ta asüba tangatetba nung India yanglushitsü merangra, iba jagi India ya India memesüki kümadoktsü. Tangbo India nung kin ishikati dang nüchiso meshir aser state balaka razüka onür, saka kodang India ya Hindustan asütsü, India nung nashi shi mamshitsü aser tanga tamangba yimsü tenla kia meyangludaktsütsü ta nokdakdir, idangjibo India teyong nung state ishika toktsür anüdok aser anülulen alir ajaki India dang nüchiso meshia ayimtentsü. Iba ama tamangba yimsü, chiyongtsü aser kin tulu tila tsütsü India nunger aika shitakba nüchiso menguteti tetsübu tia nung aliba dang masü saka ano India nunger aika chiyongtsü maka aonung tebok tazüng yipteni aier. Tanurtem aika kaketshidaki moutetter aser aluyimertem aika sen apuba sentsü maotetba tebilemtsü makok suseta asür. Item ajakji nüchiso akaba senso dak aketba yimya masü. India nungerbo India nunger saka India nung pei amangnütsü mamangtetter, pei chinütsü mechitetter aser sadoka mesenzütetter ta süra pa mesüra laji nüchiso akaba India nunger masü. India nungerbo India nunger saka kar chiyonger mechiyongma tokzüka endokdang, kar aya agi asür, kar lir melima kiojen anüng tonga tua sütepdang kar talidak maka shiruru jenjang nung alir ta süra nüchiso ngur küm 70 jungaka, ano sensosanger tesadang kabo nüchiso manguba tia nung lir ta sayur. Nüchiso anguba tetezü ya telok tulubai tilaba mezüngmeshitsü ta masü, telok tuluba- tilaba kecha mali ajak kasasa sensosanger , anungji kati ka akümtsübutepa alitsüla. Ibaji dang shitakba nüchiso akaba lima aser nübortem asütsü.