India nung nütsüng lakh shia nung tb agi shiranger 211 liasü: WHO

New Delhi, Monupii/May 18 (Agencies): 2016 küm India linük nung nütsüng lakh ka shia nungi tuberculosis (tb) agi shiranger 21 liasü, ta tanü osang ka ajanga metetdaktsü.
Kasa küm Bangladesh nunga nütsüng lakh ka shia nung tb agi shiranger 221 aser Myanmar nung lakh shia nung tb agi shiranger 361 liasü, ta WHO-i sayaba World Health Statistics 2018 nung shia lir.
Ajisüaka India den medemdangra, Nepal aser Bhutan na nungbo tuberculosis (TB) agi shiranger tajemba liasü, ta WHO-i metetdaktsü.
2025 küm tashi nungbo linük nung tuberculosis tashidak meshimeshia samatsütsü nükjidong yur inyaker. WHO-i 2030 küm tashi nungbo alima nung tb tashidak meshimeshia samatsütsü atemzüka lir.
World Health Statistics 2018 ajanga ashiba agi, TB tashidak ya tebilemtsü khuret tuluka lir aser iba tashidak anema junga raradar, ajisüaka terenlok kanga mezülongi odar.
Alima jenjang nung 2000 küm nungi 2016 küm tashi nung (küm 16) TB tashidak shilem 19 ajema kümogo. Iba tetezü 2000 küm alima nung nütsüng lakh ka shia nung tb agi shiranger 173 tashi aliba nungi 2016 küm nungbo alima nütsüng lakh ka shia nung TB agi shiranger 140 dang liasü.
WHO osang ajangasa ashiba agi, 2015 küm India nung maternal mortality ratio (MMR) ji tanur lakh ka asoba shia nung 174 liasü. 2030 küm tashi nung nükjidong balala ataloktsü atema atemzüka aliba Sustainable Development Goals ajanga alima linük ajak nung MMR ji tanur lakh ka asoba shia nung 70 dak tajemba asutsü atema inyaker.
2015 küm India nung anema alibaren tsütsü sen indokbji (per capita health expenditure) US sen 63 shi liasü, aser ibaji China (US sen 426) dang nungi tajemba lir saka Pakistan (US sen 38) dang nungibo timba lir.