India nung rongrong

Taoba küm December ita nung Citizenship Amendment Act (CAA) laletba sülen India ajungalen rongrong tulu adokba maneni tuluba tuluba adokyonga odagi. CAA ozüng latettsüba ya BJP teloki mapang talangka nungi inyaktsü bilema aliba mapa ka inyaker, kechiyong tang ya parnok asoshi mapang tajung ka lir. Linük asoshi telemtetba agidak sabang Lok sabha nung BJP tatartemsa teimba aser Rajya sabha nunga parnoki anir takok angutsüsa yimten telok aika den tesendaktep junga lir. CAA ya ozüng küma latettsü asoshi tatar senden nung jembidangbo, Nagaland nungi yokba Lok sabha aser Rajya sabha tatar anapronglai BJP telok pusema nokdak. Iba amaji BJP telok nungi mesüaka tanga yimten teloktem nungi yokba tatartemi yariba ajanga BJP tebilemba tongteta CAA latet. Atangji, India nungbo bendanger shinga nema senso temeten magütsütsü ta masü saka tamangba yimsü nung telemsa adokdakja mebendangtsüla ta nübortemi nokdaker. Atangji, linük nung nübortem atema telemtetba agidak tematibaji Lok sabha ya asütsü, ajisüaka tang amai linük nung nübortem pei lima agi nümadangteta aser kin kidong aser tamangba yimsü kecha tebendang melii longjema lidaktsütsü mebilemi tatartemi takok apia telemtetba agira, iba jagi nübortem rongnung mulungmelemtep aser tsükchitep adoktsü. Atangji, India nung Hindu nunger nütsüng teimba lir saka iba jagi India ya Hindu nunger lima mekümtet. Iba kasaji Nagaland nunga Khristan teimba saka iba jagi Naga lima ya Khistan lima ta meshitet. Iba jagi Nagaland nung Hindu aser Muslim nungertem ajak pei tetsü taso lima dang nungi temulung tesüngzükba ,tayongba aser tajungba, tetsübu melii, alir. CAA ozüng anema linük nung yimten aser lokti tentettem aikati ola adoker aser iba kasa ken o ya Supreme court nung angadang tenzükogo. CAA anema ola adokertemi India nung bendangertem nem senso temeten magütsüner masü saka tamangba yimsü kar yutsür kar tenüng nung dang senso temeten agütsüba nungji tarutsü India atema lendong angur. Muslima lima Pakistan, Afghanistan aser Bangladesh nung Hindu nunger shirnoksa Hindu nunger asüba agi reshikangshi angur, parnok nembo India nung senso temeten agütsütsü saka Myanmar (Burma) aser Sri Lanka ama lima nung Muslim nunger reshikangshi ajuruba agi India nung jenoka alirtem nem temeten magütsütsü ta asüba ozüngji ozüng tajung masü. Iba ama ozüng jagi Hindu aser Muslim na tsüngda mepelatep adokdaktsür. Atangji, Pakistan, Afghanistan aser Bangladesh nung tamangba yimsü meputep agi reshikangshi marem arua India nung jenoka alirtemji Hindu nunger dang masü saka Khristan, Budhist, Sikh, Jain aser Parsi nungertem dena lir, ajisüaka parnokjibo tanatsü dang lir. Iba CAA onük jemdidang jet ta temulungi arubaji, India nungsa Khristantem tesashiba reshikangshir. Tsüngrem temeim sayua mapa tajung inyakba atema Khristan Missionaryba den par jabaso ana parnok gari telonglen shibanga yutsür taküm rongseta südaktsüba limaji India lir. Tesem aika nung Khristan sadema mekülemtetter. Yisu Khrista kürakyanglu dena meyangludaktsütsü nokdangba limaji India lima lir. Iba ama lima ka nung kodaser tangalen reshikangshi ajuruba Khristan purtem nem seno temeten agütsüner ta süngmanga bilemer. Ashiko, ibaji Khristan limatemi anema ola adok tsübuba agi asütsüa akok. Ajak dak alaka India ajaklen University aser College ajak shibanga yur CAA anema longkak aitba olaji BJP teloki aniba center government-i angatsüla. Tatar senden nung menden teimba anguba jagi linük nung nübortem teimba parnok den lir ta mebilemtsüla. Aji oda, election nung yariyonga tang amaji tang aser tarutsü lanurtem akoksatsüsa tatar senden nung latetra, nübortemi ola adoktsübasa. Tatartemi tatar senden nung kechi latetdir, aji tatembang ta mebilemtsüla. Tatar senden madak obendangdak lir asr obendangertem madaka nübortem lir, anungji nübortemi magizüktetra, tatar senden nung temzüng ozüng latetbaji amajok asütsü, mapa küma meinyaktettsü. Tatar senden nung latetba temzüng ozüng agi rongrong masü, alima dangi tesünep aser yimjiyimjung bener arutsüla.