India nung Samsung Pay sayaogo

New Delhi, March 23 (Agencies): India nung digital ajanga shishilembatsü asoshi sorkari anir sentong balala amshia nüburtem ajungmesoba mapang Samsung ajanga India nung senotsü tsütateptsü asoshi Samsung Pay sayaogo.
Teshimtet shishilemnbaba tesemtem nungi Samsung Pay amshirtemi sen agütsütsü.
“Tongtipang bank aser card network den yaritepa iba sentong tenzüker aser iba ajanga nisung timbai iba app amshitsü,” ta Samsung India nung Senior VP, Asim Warsi-i ashi.
Visa, MasterCard, American Express, Axis Bank, HDFC Bank, ICICI Bank, SBI Card aser Standard Chartered Bank tem ajanga Samsung Pay ya agütsütettsü. Item kisüng masü Paytm aser sorkar indang Unified Payments Interface ajanga iba sentong ya amshitettsü.
Samsung Pay amshitsü asoshi Samsung Galaxy smartphone nung card ya shimtettsü aser ‘fingerprint’ mesüra PIN inoktsütsü aser ‘Point of Sale terminal’ anasai phone ya bener aruba ajanga sen ya pasasa agütsütettsü.
Iba Samsung Pay ya Samsung Galaxy S7, Note 5, S6 edge+, A5 aser A7 phone tem nung amshitsü akoktsü.
“India nung shilem 86 bu shidi sen amshia shishilempar. India ya ‘informal economy’ ka lir aser ‘formal economy’ kümdaktsütsü asoshi kanga meranga inyaktsüla,” ta Niti Aayog nung CEO, Amitabh Kant-i iba Samsung Pay sayaba mapang ashi.
Samsung Pay ya 2015 küm Julu ita nung mezüng saya aser iba sentong ya US aser China tensema ‘global market’ 12 nung amshiteter.