India nung scientist temi ‘smart wheelchair’ design süogo

New Delhi, October 21 (Agencies) : India nung scientist temi lenmang nung tetsüdaktsü aliba aser yangji mena aliba nisung belema tashi ajema akümba takzütetba wheelchair ka yanglutetogo.
Iba smart wheelchair yagi ano yangji mena aliba nisung telumungjang arakzükba, temang temperature mesüra temang nung tanga timtem aliba dena metetdaktsür, ta scientist temi ashir.
Maharishi Dayanand University, Haryana nung Department of Electronics & Communication nungi Naveen Kumar Malik aser National Physical Laboratory nungi V.R. Singh nati iba wheelchair indang terasaji international kaket, Human Factors Modelling & Simulation nung agüja lir.
Smart wheelchair yanglutetertemi iba oset azüoka amshitsü aser temetetsütem ajak peria agüja lir. Ibaji ajanga tamshirtemi tanga wheelchair dang nungi tajangzük tajungba angutsü, ta parnokisa ashi.
Microcontroller nung temeküt tesem aser iba wheelchair amshirtem ola tendangtsü tapu trok keta lir aser ibaji ajanga iba wheelchair “smart” kümdaktsür. Iba inyakyim dang scientist temi ‘cognitive wheelchair navigation system’ ta ajar.
Microcontroller inyakyim tasenba ya ajanga iba smart wheelchair agi lenmang nung tetsükdaktsü ajurutsü aliba metetdaktsür aser tamshirtem animezüktetba mesüra anünüba metetba den temang nung timtem adokba metetdaktsür. Scientist temi iba wheelchair ka yangludanga lir aser kobi meli tayoktsü atema yanglu tenzüktsü.
“Iba wheelchair tayoktsüsa yangludenba sülenbo healthcare industry nung wheelchair nung amenertem anepalutsü ayuba nisung menüngdaki akümtsü aser timtemertem kanga ajangzüktsü,” ta scientist temi ashi.