India nung ‘second class citizen’ mali: Nagaland Angh

Dimapur, November 6 (TYO) : India nung alir ajakji kasa dang aser asen linük nung ‘second class citizen’ mali kechiyong asenok loktiyimten aser tamangba yimsü ajak amangtetba linük nung alir, ta Nagaland Angh P.B Acharya-i ashi.
Nisung kati pa mulungba tamangba yimsü amangtsü temeten lir aser iba tamangba yimsü amangba atema nümatanga bilemtsüla, ta Acharya-isa metetdaktsü.
“School aser shisaluyimba rejutem asoshi shisatsü alibatsübaji kanga tongtipang saka ajak dang tongtipangbaji sobaliba tesayubatem metetba lir” ta paisa shisem.
November 6, 2015 nü St. Mary’s Montessori & Higher Secondary nung Parents Day amungdang tongti tesemdanger Nagaland Angh Acharya-i iba onük jembi.
“Nü shisaliok jenjang, nü degree, shisatsü temji na atema dang masü saka nür kibong, nür yimtsüng, nür lokti aser nür linük asoshi lir. Nü dak iba tangatetba ya lira asen linük tejakleni aotsü” ta Angh-isa kaketshirtem ayongzüka jembi.
Education ya sen aazüktsü atema wadang ka masü saka asoshi teinyaktsü khuret ka lir, ta paisa metetdaktsü.
Nagaland Angh P.B Acharya-i tanü St. Mary’s Montessori & Hr. Secondary School atema sempet pungu yimjak nung metetdaktsü aser iba dang Governor’s award ta ajatsü.
Sempettemji Rabindranath Tagore Award (Best Cultural event), Dr. APJ Abdul Kalam Award (Best Student in education section), Dr. Talimeren Ao Award (Best student in sports), Dr. P. Shilu Ao Award (Student of the Year) aser Mother Teresa Award (Best Student in the Special class section) nunger lir aser item ya sangküm nungi agütsütsü ta Angh-i ashi.
Iba sentong nung Class 1-8 nung azüngertemi Linük Naklu ken aten, class 9 kaketshir Tonugha-i tesentepertem pela agizük, St. Mary’s Montessori & Hr. Secondary School principal-i sempettem agütsü aser vice principal-i anküp tepela o jembi.