India nung sen lakh 5.46 alang Mahindra e2oPlus Electric Car sayaogo

New Delhi, October 21 (Agencies) : Mahindra-i taküm electric gari kanga nendaka yanglur. Parnoki taoba mapang e-Verito sülen e-Supro van sayaba asenoki nguogo aser iba sülen tang kishi 4 aketba e2oPlus sayaba angur.
Mahindra e2oPlus ya tapu asem nung angutsü aser item jenjangtemji sen lakh 5.46 nungi lakh 8.46 (ex-showroom, Delhi) tashi lir.
Mahindra-i, iba gari ya kanga tesatem aser mezüng anidangdang yongi ibaji jungjunga jangjatsü, ta ashi.
Electric gari asünungji, linük sorkari FAME ( Faster Adoption and Manufacturing of Hybrid and Electric) inyakyim kübok agütsütsü nangzüka aliba tangutsütem dena customer temi angutsü. Tangtangbo Mahindra-i iba gari ya linük telungtet nung dang ayoktsü saka bendangleni yoktsü tebilemba mali.
Kodang jungjunga reprangdir iba gari tejaklen agi Scorpio aser tanga Mahindra garitem mesüker. Iba gari ya 310 mm nungi 3590 mm tashi agi talangba lir aser wheelbase 300 mm agi tajungketba lir.
e2oPlus gari nung GPS ajanga amshiba navigation system aser gari anirtem dang temetettsü osang sayuba computer dena lir. Touch-screen monitor ji amshitsü kanga temela aser telangzüba kanga kara angur.
e2oPlus nung SOS feature aliba ajanga battery tashi noklang nung shilem 10 teküpok akümdanga gari kilometre 7 nungi 10 tashi tali oteter.
Iba inyakyim ya button ka nung anemba mesüra nü smartphone nung e2oPlus app ajanga activate sütettsü. Mobile app ajanga gari indang air condition shibangli tsüklokli ta sütetba den gari kishia lopokteter aser shibangteter.
e2oPlus gari nung 3 phase induction motor nung 40 Brake Horse Power (bhp) aser torque 91Nm aliba ajanga tashi kanga itdaktsür.
Gari nung 210ah lithium-ion battery inokja lir aser ibaji khen charge asüba agi gari 85Km/h tashi kara aniteter aser kilometre 140 tashi oteter. e2oPlus gari indang battery sünga charge asütsü atema mapang gondha 9 agir aser gearbox-a automatic lir.