India nung shishilembatsü tasak: Rahul

New Delhi, November 01 (Agencies): Gujarat nung Assembly elections agitsü mapang ana nung lia BJP aser Congress na aitsütepba mapang ka nung Bodhbarnü Congress tatong Tir, Rahul Gandhi-i, tang nüburtem tejashi mapang ka nung lir, anungji Gujarat election mezüng anogo nung BJP-i takoksa angutsü, ta ashi.
Gujarat, Bahruch nung party senden ka nung jembidang Rahul-i iba o ya jembia liasü.
World Bank’s Ease of Doing Business osang nung tematiba jenjang 100 club nung India-i jenjang 30buba anguba aija Rahul-i, “Iba jagi atangji nungbo linük nung temelenshi madok. India nung shishilembatsüji tezüba masü, sen notes anentsüba mesüra GST ajanga kecha tajangzük magütsü,” ta ashi.
Tanep pai twitter ajanga Union Finance Minister, Arun Jaitley aija, “Shishilembaba melabaji ajaki meteta lir Dr Jaitley, ajisüaka ibaji na pelatsü atemabo junger,” ta ashi.
Congress lenirisa, demonetisation aser Goods & Services Tax (GST) ajanga Gujarat nung BJP-i takoksa angutsü, ta ashi.
NDA sorkar mapatong ajanga Gujarat nung micro, small & medium business tamajungba akoksaogo, ta paisa ashi.
“November 8 nü (2016), Ato kilonser Modi-i menürema sen 500 aser 1,000 notes anentsü. Pa ajanga aluyimertem, aayangertem aser tilateri shishilembartem takoksa ngudaktsü aser linük rongsenkettsüng jenjang ajema alu. Iba jagi-a melung masü amai pai GST benok. Gujarat aser linük nüburtem tang jeptepdar,” ta paisa ashi.
“Ato kilonser Modi-i iba ya mangatet- sen ajakji ochimashi sen masü, ochimashi sen ajakji sen masü. Tesüiba küm asem tashi BJP sorkar tashi nung lir. Süra tang Swiss bank account alir kwi tepoukdak lir? Vijay Mallya bo England nung jangratema mongdar,” ta paisa ashi.