India nung tamangba loktitem tsüngda mepetmesü magizüktettsü: PM Modi

London, November 12 (Agencies): Brihostibar nü London nung India Ato kilonser, Narendra Modi-i, India linüki tamangba lokti tsüngda akhümtsübutep maliba aser mepetmesü kodanga magizüktettsü, ta ashi.
India nung tamangba lokti telemsa tsüngda yimjiyimjung maliba dak sentakba nung tanü London nung osangbenertemi asüngdangba ka langzüdang, Ato kilonser Modi-i, “Item ama tatalokba anema India ketdangsertemi temerenshi tulu agütsütsü,” ta ashi.
“India-i tamangba lokti tsüngda akhümtsübutep maliba aser mepetmesü kodanga magizüktettsü. India ya Lord Buddha aser Mahatma Gandhi nunger aliba linük lir,” ta Modi-isa ashi.
“Onok ya loktiyimten linük lir aser sadoka jembitetba temeten atema onoki inyaktsü. Onok ya tamangba lokti tsüngda akhümtsübutep maliba lokti ka masü,” ta Ato kilonseri ashi.
Tanü Ato kilonser Narendra Modi Delhi nungi Britain-i apusoa ao. Modi-i asemnü United Kingdom semdangba mapang India aser Britain na tsüngda investments aser defence cooperation nung tezüngzüktep aika agitsü imlar.