India nung tang mezüng biofuel amshia tayimtsü ayim

Luroi/August 27, 2018 nü Dehradun nungi Delhi tashi ‘biofuel’ amshia tang mezüng tayimtsü ka ayimba sülen tayimtsü anendak Union Civil Aviation Minister Suresh Prabhu, Road Transport & Highways Minister Nitin Gadkari, Science & Technology Minister Harsh Vardhan, MoS for Civil Aviation, Jayant Sinha aser Oil Minister Dharmendra Pradhan nunger tangokba noksa nung angur.

New Delhi, Luroi/August 27 (Agencies): India nung tang mezüng tanü biofuel amshia tayimtsü ayim.
Menden 78 aliba aircraft Bombardier Q400 tayimtsü nung biojet fuel amshia tanü Dehradun yimti nungi Delhi nung aliba Indira Gandhi International Airport tashi ayim.
Iba totzü ya CSIR-Indian Institute of Petroleum (IIP), Dehradun-i yanglu aser iba nungji aviation turbine fuel shilem 75 aser biofuel shilem 25 dena lir, aser ibaji Jatropha crop ajanga yanglu.
Iba tayimtsü nungji nisung 20 mena liasü, aser parnok rongnung aviation regulator DGCA aser SpiceJet nungi ketdangsertem densema liasü.
Tayimtsüji Delhi nung anenzükba mapang nung tayimtsü anendak Union Minister- Nitin Gadkari, Suresh Prabhu, Dharmendra Pradhan, Dr Harsh Vardhan aser Jayant Sinha nunger liasü.